目睹大仔被家傭搣鼻 葉翠翠：唔開心到又暈又嘔

葉翠翠3年抱兩，上月底誕下2仔「小小王子」，現時專心坐月及照顧兩位囝囝的她，日前在社交平台大呻傷心事，皆因她親眼見到工人搣1歲多大仔「小王子」個鼻。她留言：「我真係好唔開心！昨天（23日）比（畀）我親眼見到工人搣小王子個鼻仔，我問佢點解要咁做，佢話係細細力，細細力咁又點？係咪就可以搣？我細細力搣你個鼻得唔得？我話平時對你咁好，你竟然咁做！我問佢有人咁搣你個仔得唔得？（佢有個仔）」。

葉翠翠續說：「工人所需要的我都會提供，如全部日用品，買衫買鞋，她喜歡的飲品食品，加人工，我全部都比（畀）佢，佢個仔生日我都有買禮物寄比（畀）佢，只要工人開心我就願意比（畀），我在醫院時比（畀）錢佢日日搭的士去醫院，對佢咁好，原來都係一樣，我真係好唔開心......我昨晚唔開心到又暈又嘔......」

視王子們是命根的葉翠翠又表示：「梗係嬲豬爆啦」，接受傳媒訪問時她謂當日工人無解釋為何搣大仔的鼻，當時睇到大仔捉住工人隻手，認為工人想搣痛大仔令他放手。