執二攤拍《逆緣》 陳家樂自爆曾驚佗衰家

無綫劇集《逆緣》收視報捷，平均收視26.7點，7天跨平台收視更高達30點，即約196萬人次收看；更是截至今年5月18日，榮登2018年劇集收視之冠，故無綫於昨晚舉行慶功飯局，陳家樂、陳山聰、黎諾懿、林夏薇、監製王心慰、高層樂易玲及曾勵珍等都有到場慶祝。
因為演這劇冷凍人鍾定國爆紅並成功入屋的陳家樂，坦言完全想像不到有如此好成績。他自爆拍攝時相當負面，自覺會「佗衰家」，令收視得10幾點、禁播甚至成為倉底劇集。他說：「我真係估唔到監製王心慰會用我，一個知名度極低嘅小朋友，突然搵我入TVB，仲要演一個咁重嘅角色。」他承認現時似打了強心針，終於有觀眾認識，更希望再次接拍新劇。
因有報道指角色原先為鄭俊弘飾演，會否覺得星運來臨？家樂說：「我真係唔知呢件事，都係睇報道。我又無咩特別感覺，我演嘅角色，都係大家所講嘅『執二攤』嚟。其實最緊要有準備，有機會要做好佢。」問到最替他開心是否女朋友余香凝？他說：「最開心當然係屋企人，阿仔終於都衣錦還鄉。」可希望原班人馬再拍續集？他說：「咁梗係最好啦！觀眾都想睇我哋三爺孫。」（攝影：朱偉彥）