【梁天琦案】梁承認人群向警擲物「係有問題」 本民前無架構可言

於前年年初二凌晨在旺角發生的騷亂事件，本土民主前線前發言人梁天琦等人，否認暴動、煽惑暴動及非法集結等6罪，案件於高院續審，首被告梁天琦繼續岀庭自辯。
控方指岀片段所見，案發有在場人士手持盾牌但未有身穿本民前的衣服，而本民前的成員當時則有約30、40人，惟根據同意案情，警方檢獲共8個盾牌，即當日本民前盾牌的資源有限，「要派俾你個黨都唔夠派」，何以會派給並非成員而控方所指的第2被告李諾文，梁天琦表示相關盾牌「唔知幾時拎過嚟、點樣拎過嚟」，而且「點樣分配我都唔知道」。
他續指，於2015年間，有人於群組提及想買盾牌，但他沒有理會，梁認為「香港好一段時間會冇好似佔領運動嘅大型示威，所以我唔覺得用得著」。另外，他又表明不知道，同案其他被告在場的目的是否與他或本民前一致。
被問到是否認識全部本民前的成員，梁稱「有啲見過，有啲見得少啲」，他解釋本民前「冇咩架構可言，好多人都來來去去」，但重申當時從未見過其他被告。
此外，梁同意警員可以執法及呼籲人群不要聚集，而且警方驅散人群亦是合法的做法，惟控方指岀當時人群推撞和向警方投擲雜物，並隨即問到：「人群做緊嘅係唔啱嘅？」梁回應稱：「係，係有問題。」控方進而追問「係唔係唔啱？」梁則補充：「有可能傷害到人，係唔啱嘅。」
法庭記者：陳詠詩