歌迷唔肯走大叫Encore 草蜢難抵熱情超時照OT

草蜢紅館演唱會昨晚才第二場，還要是周一，但卻無損歌迷熱情，完騷後觀眾不肯離開，大叫Encore，草蜢抵不住熱情，返上台再唱多兩首原本歌單沒有的《永遠愛著你》和《失戀》，雖然連燈光師都已收工，沒有射燈、沒有舞蹈員，但全場觀眾開著手機電筒大合唱，草蜢3子走到台邊與觀眾握手，又在台上感動地說：「今晚你哋令我哋好開心、好興奮！」唱完兩首歌後，草蜢一邊降落台下一邊大叫：「多謝！I Love You！」 雖然有說星期一開騷觀眾比較Cool，但草蜢的歌迷一反傳統，超級熱情，開騷不久就全場玩人浪，玩足成首《歲月燃燒》，勁high！ 臨時Encore之後，草蜢返到後台，蔡一智自爆剛才換衫換到一半衝返上台，說：「我返到後台褲都換埋，紅館開晒燈，觀眾點都唔肯走，仲以為佢哋星期一返工，但原來佢哋唔制，結果我著住自己條褲上返台！」蘇志威坦言監製透過耳機表示超時，蔡一傑說：「佢哋真係好crazy！連燈光師都收晒工，和音都換晒衫！」阿智接著說：「觀眾響應我哋開場時所講： 『你哋愈瘋狂，我哋愈crazy！』唔知之後啲觀眾會唔會都咁熱情呢？！」他們再次多謝觀眾熱情支持。