【天價成交】張智霖傳$9180萬買豪宅 同Sammi做鄰居

大坑豪宅大寶閣又有驚人交易，大坑大寶閣2465方呎單位，「天價」9180萬元售出，成為屋苑同類單位歷史新高，今次嘅買家竟然、竟然、竟然係張智霖（Chilam）！而翻查土地註冊處資料，張智霖喺以個人名義 (Cheung Chi Lam,Julian)入手。但原來同一幢樓「樓市小富婆」鄭秀文（Sammi）喺1998年入市，只係2280萬。 市場消息傳出，Chilam入手嘅單位面積2465方呎，天價9180萬元售出，折合成交實用呎價約37241元，創屋苑同類單位歷史新高。據指，單位擁有無敵全維港海景，而Chilam同袁詠儀（靚靚）以及囝囝張慕童（魔童），一家三口聽聞一直以嚟都係租樓住，但計落條數Chilam即使係首次置業，印花稅都幾百萬。 睇返紀錄，同一幢樓原來都有明星小業主，講緊嘅係鄭秀文（Sammi），1999年傳出Sammi用2280萬買入高層A室，以帳面計，單位升值幾倍有多。一向投資有道嘅Sammi，仲係2008年金融海嘯連掃2個豪宅，趁低價入市，市傳當年只係用3000萬左右，就入手渣甸山嘉雲臺同半山蔚皇居。