想唔使做又俾觀眾記得 許紹雄笑住做歡喜哥受歡迎

無線劇《使徒行者2》在香港播至尾聲，內地網已播畢，結局出晒街。劇中飾演歡喜哥（覃歡喜）的許紹雄接受媒體訪問時分享拍攝過程，指監製提議一改反派的演繹方式，並謂這個角色是「笑住嚟做」。 與《使徒行者》相比，《使徒行者2》的投資多很多，所需的製作時間也多了，許紹雄認為整體的效果很好。他續指飾演的角色沒有改變，仍然是歡喜哥。談到真人與歡喜哥有沒有相似之處時，許紹雄表示：「咁就梗係唔似啦！歡喜哥係黑社會嚟㗎嘛，我又唔係黑社會。」他認為自己不像歡喜哥那麼火爆，而本來的性格則是一個很懶的人，不會積極爭取任何事。 許紹雄指這次他需要拍攝打戲，拍攝完之後很疲累，需要休息數天才可復原。他笑指：「你知無咩點郁嘅人，一郁起上嚟就咁㗎啦，都唔算NG好多，好彩同其他對手夾到，（佢哋）就到我。」問到若不飾演歡喜哥，會選擇那個角色？許紹雄搞笑地回應：「唔做歡喜哥，做第1集嗰5個臥底其中1個，一嚟到就炸死，咁跟住就唔使做喇。1集就已經令你記住佢喇喎，幾好吖，有啲可能由頭到尾，企喺你旁邊後面嗰啲，你都無發覺。『吓！你有份嘅咩？』但佢第1集就炸死，起碼有人記得。『嘩！你第1集就死喇喎！』又唔使做又有人記得。」 許紹雄續說：「歡喜哥呢個角色，其實講返起係笑住嚟做，喺《使徒1》嗰陣監製文偉鴻提議改改反派個演繹方式。以前一般啲戲，個道友就會化妝化到好似成個道友咁。真係道友個啲，你睇下，一啲都唔似道友，一啲都唔似吸毒。做賊個啲一眼睇就知係賊，仲使咩做！所以就試下用笑嘅方法去做，估唔到咁樣係咁受歡迎。」