【結局好兒戲】陳展鵬搞掂Boss鮑姐去耕田 網民:一早當喜劇

今晚《同盟》大結局，收唔收貨？講返劇情，鮑起靜飾演的令熊要結束令氏，心懷不軌的「家名」林子善、「令熹」韓馬利阻止唔到，又將安全屋位置告知Rainman，想借刀殺鮑姐不果，林子善又親手殺死韓馬利，拎住偽造的授權書跟同盟宣佈已接管企業；不過又係「子杰」陳展鵬設下的局，林子善跟同盟一大班人被Rainman放毒氣焗死。 陳展鵬害死親人，遭鮑姐訓斥他冷血無情，其實一切都在陳展鵬的計劃中，他成功說服四大財閥，Rainman江美儀死了，救得返阿媽鮑姐同兄弟「千佑」陳山聰，陳展鵬更當上新一代Rainman，失蹤兩年搜集財閥的罪證，要一網打盡惡勢力。另邊廂，鮑姐由女強人變成歸隱田園，真係「返鄉下耕田」，新抱「以柔」姚子羚仲大肚添；「清欣」胡定欣癡癡的等待愛人，最後當然遇返陳展鵬，二人在雨中相擁，完了。 好多網民唔多Like結局，有人話一早當喜劇睇，合家歡時段每晚8點半播更適合，彈結局「趕收工，好爛」、「真係頂唔順」。網民講出唔少犯駁位，例如「四大財團用兩場戲就被解決？仲易對付過rainman」、「一班咁勁嘅幕後大佬，幾句就俾陳生攪掂，拿拿林大團圓結局」、「政治部都冇杰杰咁多料，KO財閥」、「就係臨尾主角威晒，就咁完」、「劇情好似小學生以為自己寫咗啲好有意思嘅故仔咁」、「成集結局陳展鵬由頭到尾都chok住，想點？」 另外，江美儀臨死一幕有笑料，殺手齊齊電話響，收到「殲滅」指令，網民笑指「只可解釋手機已成為現今世代萬物之靈，殺人都要同部手機confirm下」。陳展鵬明明成功人間蒸發兩年，不過KO財閥後，一行出街又見返定欣，真係做戲咁做，網民又插「完全趕收工得好緊要」。