孖胡蓓蔚嘆Tea　胡定欣低胸搶鏡

胡定欣早前拍完《深宮計》後，即放長假孖父母遊日本，回港後再搵老友陳山聰出海晒水著相。夏日炎炎，胡定欣繼續以清涼裝扮示人，孖「豹嫂」胡蓓蔚、周子駒去靚靚Cafe嘆茶。 周子駒仲幫兩位靚女影「寫真」，胡定欣拎埋花花做道具，加埋個燦爛笑容，冇得輸吖。不過豹嫂就有微言：「#又搵我做司機 #又逼我襯衫」，唔好咁啦，著到靚一靚影相咪幾開心。

嘆完Tea，有「豹哥」單立文、張頴康同囡囡小豆加入，齊齊去食飯，補祝返張頴康去年底連奪兩次「飛躍進步男藝員」獎。胡定欣開心約足大半年終於齊腳食飯，並留言：「張穎（頴）康...如果你仲有情深說話未曾講，下餐飯...到你！！仲有終於有機會見到超可愛既（嘅）小豆，豹Uncle最好，由怕佢到同佢friend左（咗），掂！！老豆（竇）...睇你尋（噚）晚既（嘅）表現，真係可以生個黎（嚟）玩！！」