男神林宥嘉拍片祝壽勁感動　鄧小巧28歲生日望練出腹肌

剛踏入28歲的鄧小巧，昨日（24日）在中環舉行生日會，適逢新歌《兩溝》，生日會亦將歌迷、電台聽眾、街上招來的市民「溝埋一齊」開party和玩遊戲，有歌迷更帶埋老婆仔女出席，全場大合唱生日歌和切蛋糕，非常熱鬧。小巧一心以為開party為歌迷搞搞新意思，結果反被唱片公司同事送上偶像林宥嘉的祝福視頻和禮物而非常驚喜，仲感動到眼濕濕添！ 小巧表示一直以來生日都是與家人和相熟朋友，簡簡單單食餐家常便飯，平淡地度過生日。今年是她第一次搞大型生日會，感覺得新鮮和難忘。她說：「我咁大個女第一次同陌生人慶祝自己生日，有fans仲帶一家大細嚟，好開心！仲有同事靜靜雞叫咗我男神林宥嘉同我講生日快樂，仲有親筆簽名後台證，好感動！今年生日願望同往年一樣，希望大家都身體健康！」

問小巧大一歲有甚麼計劃？她哈哈大笑，說：「其實一直都希望練出腹肌，但我實在太為食啦，加上近來生日好多飯局，好多朋友約我食食食，要等食晒啲生日飯就新重新操練，唔好話腹肌咁勁，練返啲腹部線條已經好好。」自稱失暈魚的小巧還大爆生日扮靚趣事，說：「因為要着呢條咁靚嘅紅色裙，朝早突登攞對高踭鞋襯，點知嚟到換鞋先發現攞咗兩隻都係左腳，笑到肚痛之後仲要衝落街買對新鞋，今個生日好開心呀！」