想做食環署　黃秋生寸爆：冇嘢搵嘢做，有嘢當冇嘢做

黃秋生與立法會前主席曾鈺成今日錄影ViuTV節目《埋班》，談到若曾主席做特首，秋生會否自薦做局長？秋生笑說：「我想做食環署，執吓垃圾、捉吓老鼠同曱甴、搞吓滴水咁，幾好做。總之冇嘢搵嘢嚟做，有嘢就當冇嘢做，見邊間食肆好生意就去查牌、掃場，搞到佢哋死為止！」

對於盛傳陳美齡任下屆教育局長，秋生再爆金句：「假如係以三個仔入史丹福做標準就有啲問題，好多人冇入史丹福都成功，咁唔通入耶魯、哈佛就唔得咩？教育唔應該係咁。」此外，談到內地「MMA狂人」徐曉冬「挑機」中國武術，秋生大讚他的確打得，但又語帶相關說：「感覺好似返到5、60年代的香港，一個地方落後就會多呢啲嘢，睇唔順眼就揼你，野蠻係落後嘅象徵。（他連李小龍都寸。）李小龍都成日寸人，他的年代就是落後，正如我細個都成日同人上天台隻揪。」秋生又指中國武術博大精深，不是打贏一個半個就等於打跨整個中國武術，笑問曾演葉問的他有否興趣出戰？他耍手說：「我係莫問！」