圓網民心願拍片講結他　謝霆鋒懶到爆用腳趾撳熄機

繼謝霆鋒chok爆揈蕉後，日前他再獻新猷，自創衣架掛pasta大法，引得好友容祖兒抵死跟風，二次創作為衣架掛假髮，發放笑彈。霆鋒拍片自製pasta時，同時曝光埋客廳格局，仲俾眼利網民發現電視機隔離放了一把結他，好奇問霆鋒用開咩型號。 有細閱網民留言的霆鋒，今日圓網民心願，拍片介紹結他之餘，兼自信滿滿地露兩手。雖然霆鋒冇自彈自唱名曲《活著VIVA》，不過網民都叫好，意想不到霆鋒會親自拍片講吓把結他。霆鋒表示結他於2001年在台灣購入，結他表面以手繪畫，全世界有29把，而他手上則是第15把，全部獨一無二。 最搞笑係霆鋒最後拍完片，坐在地上的他竟伸腳用腳趾撳熄機，仲成功撳到。網民即笑爆嘴留言問「用腳趾熄機係乜事」、「寶刀未老…最後用腳按掉是哪招啊…哈哈」。見到霆鋒手執結他，亦有網民提出訴求「掟爛佢」、「覺得你唱歌彈結他好過入廚房揸鑊鏟」、「開演唱會」、「唱埋《活著VIVA》」。