伍仲衡開live回應被TVB「炒魷」！稱曾與高層交涉 沒隱瞞簽洪心怡事宜
2024-12-09 18:30 
伍仲衡近日被TVB「炒魷」停任《中年好聲音3》評審，有傳主因是伍仲衡與新人洪心怡簽約。不過TVB早前已澄清：「本台認為嘉賓、藝人或歌手是否與本台簽約完全是個人的自由選擇，我們尊重每一位合作夥伴的職業決策，同時，本台一直遵循行業公認的規範和道德標準，在專業和成熟的框架下共同努力，加速推動香港樂壇的多元化發展。」伍仲衡事後曾表示：「我何德何能同一個電視台爭簽一個人？你真係睇得起我。」直至昨日（8日），伍仲衡又再於網上直播回應被「炒魷」事件。
伍仲衡聲稱曾與TVB談合作
伍仲衡昨晚在直播中指，7月時為《校園好聲音-唱響中國》比賽做評判，當時已非常欣賞冠軍洪心怡的歌聲，直言非常想跟洪心怡合作，並為洪心怡寫歌，於是邀請洪心怡試音獲對方答應。《校園好聲音-唱響中國》比賽同月在TVB播出，伍仲衡強調TVB並非主辦方，如果比賽是由TVB主辦方，他一定不會動想簽洪心怡的念頭，「如果係TVB主辦嘅選秀節目，我哋係冇可能簽到。因為TVB搞咁多選秀節目，《聲夢》、《中年好聲音》……佢一定同參賽者簽晒合約。但呢個比賽係中大搞，係中大買個時段喺電視播。」
伍仲衡透露，太太在幕後工作多年，曾在多間唱片公司及TVB工作，直至去年辭職，專心處理伍仲衡的工作。伍仲衡指，與太太商量想簽洪心怡後，考慮到與TVB有合作關係，聲稱曾向TVB表示有關想簽洪心怡一事，他說：「我同我老婆講，不如你問吓TVB，我哋可唔可以合作，好簡單，佢打個電話畀其中一個TVB高層，我唔會講邊個，當然係同我老婆好熟啦，同埋打畀一個話到事嘅，希望可以一齊經營呢個歌手。」
相關閱讀：《中年好聲音》選手見有人「被炒」感心涼 言論連TVB主播林婷婷都Like？
伍仲衡開live回應被TVB「炒魷」：
伍仲衡強調：我唔係傻嘅
伍仲衡透露，洪心怡9月時為《香港小姐競選2024》與葉蒨文等歌手一起表演，而較早前伍仲衡太太曾到TVB高層商討合作一事，伍仲衡說：「我喺TVB又做緊《中年好聲音》……之前又做咁多綜藝。其實照常識，我點會唔同TVB講，我唔係白痴，我唔係傻，我老婆都唔係白痴。我同太太係絕對唔會隱瞞TVB簽洪心怡，因為我知道個後果係好嚴重。我唔會冒呢個險，同埋我同TVB關係一直都好好。」
伍仲衡指，當時他與太太曾與TVB及其高層商討合作，一起經營洪心怡的歌唱事業。但他說：「啲細則未正式傾嘅，但係傾咗一次之後，我哋再同TVB傾唔到喇，佢哋就冇再覆過我哋喇！即係我哋主動入咗去（電視城）之後，按正常程序……唔會一次傾得晒，咪再約出嚟傾囉……我哋就已經約唔到喇，即係同佢哋好似傾唔到落去，佢哋好似唔係好welcome同我哋傾。」而在商討合作後，伍仲衡稱在今年9月，他從洪心怡口中得知，她收到TVB一份合約，「洪心怡同TVB點傾，我冇權干涉，我只係靜待。如果假設TVB真係簽咗洪心怡，我就當無緣啦，咁大個電視台我同佢爭唔到㗎！」
相關閱讀：伍仲衡被「炒魷」後首談中止合作感受！強調與TVB冇不和 揭簽洪心怡真正原因
《中年好聲音》選手見有人「被炒」感心涼？
伍仲衡指洪心怡已婉拒TVB簽約要求
洪心怡約10月時曾上節目《J Music》，伍仲衡聲稱，洪心怡在錄影《J Music》前已婉拒TVB的簽約要求。伍仲衡指：「佢同我哋講返佢唔會簽TVB，我哋先夠膽真係同佢傾，我哋同洪心怡之間嘅合作。」及後伍仲衡與洪心怡母女見過數次雙方商討合約內容，「簽完之後，我就喺生日會公布，因為我唔需要鬼鬼祟祟，如果你簽一個人要鬼鬼祟祟不如唔好簽，如果你簽得你就要話畀人聽，呢個係我藝人，咁個藝人先覺得你幫到佢呀嘛，並唔係簽完佢，之後收收埋埋咁冇用㗎！」
最新回應