馮允謙街頭打波:毛巾笠住個頭都出汗釗峰驚訝識用「笠住」

2022-08-15 00:30

眾所周知，馮允謙係ABC，中文程度麻麻，廣東話咁博大精深當然都唔係太熟，之前Jay Fung開Show請咗軒仔做嘉賓，後者要求前者：「封返封老毛畀我得啦！」Jay不明白，軒仔笑說：「即係利是，真係廣東話黑洞！」之後Jay仲想講笑話，但因為中文差俾軒仔笑，「你自己中文唔好，做乜搞呢啲gag呢？！」全場爆笑。

軒仔笑鬼Jay啲中文。

唔知係咪俾人笑得多，所以Jay Fung發憤圖強努力學習廣東話。尋日氣溫最高33度，乜都唔做齋行街已經成身汗，做埋運動應該會變水人。馮允謙(Jay)同釗峰無懼高溫約埋喺街場打波，兩位波友着晒背心，仲用毛巾包住個頭，Jay出Po，「同阿BRO打街波～真係頂唔順咁熱嘅天氣，連用毛巾笠住個頭啲汗都繼續流。」波友釗峰非常驚訝，留言問：「Wow~ is 笠住 a new vocabulary for you?」（笠住係你新學嘅生字？）波友Jay笑言：「hahaha I wasn\'t sure if that\'s how u write it lol 😅」（哈哈哈，我唔確定係咪好似你咁寫），係咁寫呀，你啱咗呀，加油呀Jay Fung。