獨家丨黃夏蕙笑談性生活:老夫老妻都有開心嘢餞別宴被狂集郵老公黑晒面

2022-08-05 01:30

黃夏蕙(夏蕙BB)將於下周四(11日)隨86歲老伴潘炳烈移民美國，上周六晚，夏蕙BB於酒樓舉行餞別宴，《頭條娛樂》記者現場直擊，頭戴王冠嘅BB滿場飛勁開心，不過老公潘炳烈因不滿變成「吉祥物」，不斷被要求合照而黑晒面，仲嬲到好似小朋友咁雙手托頭，真係好想遞架玩具車畀佢玩呀，BB見狀即諗計呵返，兩位加埋近200歲嘅耆英夫婦好Sweet！強調今年「只係」89歲嘅夏蕙BB更自爆性生活依然美滿：「就算老夫老妻都有開心嘢嘅！」真係聽到個心離一離呀衰鬼。採訪：方騫平

潘炳烈手指指鬧人影佢相，夏蕙BB即方寸大亂。

夏蕙BB人緣唔錯，離港前相約一班老友於酒樓見個面，同BB做咗幾十年老友，80歲嘅盧海鵬就算行動不便一樣現身；一班「亞視之友」潘志文、徐寶鳳、魏秋樺、王瑋出晒嚟，仲有邵音音、呂珊、車叔梅夫婦、劉雅麗媽媽包曉華、張偉文經理人方俊及方麗盈等。「千歲宴」每枱設有豐富席獎，台上有切燒豬、醒獅及演出助慶。

盧海鵬及張偉文經理人方俊都係黃夏蕙老友。

車淑梅送上精緻嘅寶箱禮物。

當晚嘅出席朋友，大部分上咗年紀。

當晚菜單有燒味拼盆、炸蝦、花膠及蒸龍躉等。

席獎有金飾、茶葉、中國酒及中成藥等，仲有寫住「香港人契媽」嘅紀念品。

BB好怕老公發脾氣

當晚方俊及方麗盈齊唱《世間始終你好》；包曉華、呂珊、魏秋樺合唱《萬水千山總是情》。而最受「熟女」歡迎嘅「陳年男神」潘志文，獨唱完《大地恩情》後便跟BB共唱「飲歌」《禪院鐘聲》，主人翁在台上致謝詞：「我好想喊，好唔捨得大家，你哋太錫我…」雖然未見有淚光，但潘志文卻拉高衫尾，作狀幫她抹淚。全晚個個表現興奮，替BB餞行之餘亦跟其它圈中好友聚舊，唯獨夏蕙BB老公潘炳烈好似完全唔關佢事，唔肯上台又呆坐主家席自斟自飲，原來佢不滿入席前不斷被集郵而面燶燶，更發老脾大鬧：「影夠未？」連夏蕙BB都嚇親，乖乖咁坐返埋佢身邊，然後向助手打眼色，示意身邊人幫手護駕，擋開陌生人。

潘炳烈雙手托頭，無聲抗議做咗「吉祥物」。

好彩後來有相熟朋友同佢有傾有講，潘sir先識笑。

方俊及方麗盈齊唱《世間始終你好》助慶。

夏蕙BB台上話感動到想喊，潘志文扯起衫尾，作狀幫她抹淚。

曉華姐放下家事跟呂珊、魏秋樺合唱助慶，她向本報再次否認私吞帛金，強調人在做天在看！

夏蕙BB不忘行善，邀請賓客為黃夏蕙基金會籌款。

夫妻相處勿講大話

夏蕙BB隨老公赴美，問到可會帶備情趣內衣同老公玩吓驚喜？BB笑言唔需要，自爆兩公婆仲Keep住有情趣，她坦白說：「開心嘅嘢…乜嘢都有啦(包括性)，就算老夫老妻都有老夫老妻嘅嘢！」再追問如何保持長久火辣辣時？她更興奮地爆多兩句畀大家聽，騎騎笑說：「唔辣點可以有咁多年呀！」更坦言仍有性生活：「(性生活)呢啲梗係有啦，係順其自然！」不過，講到同老公相處之道，BB就話最重要係坦白：「性生活反而係其次，千祈唔好講大話，就算佢唔鍾意都好，都要坦誠講佢知！而且大家要互相忍讓，有時佢叻畀佢叻，有時我叻畀我叻，大家係平等嘅。」

黃夏蕙頭戴王冠，以女神造型現身。

老公投訴BB唔檢點

在旁方俊補充指夏蕙BB身材好，夠開心，所以老公對她死心塌地，BB照單全收，得戚地和應一句：「係呀！我身材好。」經理人Simon則踢爆夏蕙BB其實好Wild，笑指她打開「野戰」：「有次送佢去新田垃圾站，老公接咗佢之後，兩公婆好快就『消失』咗！據我所知，佢一返到屋企就唔着衫唔着褲，潘Sir曾投訴過佢：『你檢點吓，拉咗窗簾先啦！』」BB聽完偷笑解畫：「可以放心，唔係咁樣，只係除晒衫準備入去沖涼，呢啲係好自然嘅事，但佢驚我畀人睇到啫！」