獨家丨《造星IV》馬欣獲師兄 Frankie力撐 27歲參加唔怕遲

《全民造星IV》40強剛誕生，有得留低的78號馬欣（馬彩欣），初次登場大跳Jazz令人印象難忘，不論評判、導師及觀眾都相當受落，更讚她性感得嚟又唔Cheap，馬欣亦好意外女觀眾一樣接受她。以27歲之齡選女團的馬欣自言唔怕遲，因有MIRROR最年長成員，33歲的Frankie力撐，令她信心大增，更無懼公開戀情。撰文：杜杜、秦詠姿  攝影：葉君海、譚壹致

第一輪比賽大跳性感舞蹈的馬欣，坦承沒想過女觀眾反應正面，「唔係Sexy一定係色情，我今次表演有兩個目的，第一係想大家認識我，第二就係想畀大家見到我呢種舞種，跳出嚟係一種藝術，而家出嚟嘅反應係開心，無論男、女觀眾都好鍾意同欣賞呢個Style。之前都預咗男仔會鍾意，但會諗女仔會唔會唔鍾意呢？而家唔單止鍾意，仲有好多女仔問係咪可以上我堂。」不過講到性感演出，馬欣就要考慮，「要視乎尺度，我本身想表達嗰樣嘢唔係想Show性感，所以唔會挑戰太色情嘢，譬如着三點式或者牀戲咁，呢啲尺度我係唔OK嘅，就算好藝術性質都要再考慮。」


為偶像Twins伴舞
18歲誤打誤撞入行做Dancer的馬欣，因為呢個經驗促使她參加比賽，「以前從來冇諗過會參加，今次動機就好似以前跳舞唔小心入咗行，跟住好鍾意，都係用呢股衝勁去報名。」做了8年Dancer，曾為黎明、譚詠麟、C All Star等伴舞的她，最開心是夢想成真跟偶像Twins合作，「細個好鍾意Twins，佢哋第一個MV打側手翻，我嗰時住村屋出面有個沙灘，我就喺沙灘係咁打學識咗側手翻，點知大個咗去佢哋演唱會casting中咗，喺佢哋演唱會有機會打側手翻，成件事好奇妙。」

想向演員發展
對於27歲才參加《造星IV》加入女團，馬欣唔覺得遲，「所有嘢都唔怕遲，咩年紀想做就試咗先，一定會有啲嘢拎得走。」而參賽她還有其他目標，「如果可以打破呢個年紀入到女團梗係好，但我都想有其他方面發展，我對演戲都有啲興趣，都想睇吓有冇機會喺呢方面發展。」馬欣決定參賽原來受師兄、MIRROR成員Frankie影響，「佢同我同一個Studio學跳舞，佢早我幾屆，嗰時佢已經好照顧我，教咗我好多嘢，今次《造星》佢都畀咗好多意見，佢叫我keep住自己心理質素，喺社交平台度講嘢宣傳自己多啲，仲教咗我一啲小技巧。（佢係年紀最大成員，都畀到啲勇氣你？）都係㗎！就係冇嘢係冇可能，咁咪試吓囉！」


男友買糖水支持
觀眾緣不俗的馬欣，由最初參賽時IG follower只有6千急升至兩萬1千，而且男女粉絲比例平均，她都開心暫時未算有太多負評，「除咗有人話我似黃心穎、黃心美同林嘉欣之外，都有人話我似賓妹，哈哈！我覺得OK，我由細到大皮膚都唔白，慣咗畀人話我似泰國、越南同馬來西亞人，嗰邊啲人都幾靚，所以我都唔覺得係踩，希望可以Keep住冇乜負評啦！」馬欣更大方公開已有舞蹈員男友，「身邊朋友都支持，所以佢都好支持。（有冇畀意見？）本身我哋意見已經好多，除非我真係好煩會搵佢幫手，但暫時都冇。如果好攰，佢咪買個糖水畀我食，哈哈！我覺得夠㗎嘞！食吓嘢減吓壓，因為佢知道我鍾意食嘢。」