保錡@ERROR惡搞大宇版《倒轉地球》 自爆重睇100次

現年58歲、有「師奶殺手」之稱嘅陶大宇近年努力返大陸登台搵真銀，商演活動當然要袋住幾首飲歌，劉德華《倒轉地球》同《愛我一萬年》都係大宇嘅首本名曲。最近大宇獻唱《倒》嘅登台短片喺中港兩地瘋傳，佢以「魔音式」逐粒字唱腔，加上「水潑式」台風，非常洗腦，唔少人都剪咗短版無限Loop，成為網上熱話。

「宇宙天團」ERROR成員之一保錡，一得閒就會拍片娛人娛己，繼七師傅「閃電七連鞭」後，最近就惡搞陶大宇2.0，扮佢唱《倒轉地球》放上IG，佢話自己重複睇咗條片100次，留言話：「最近大愛一首歌，不得不重唱一次，無論表情和語氣，都表現得10分到位，所以決定表演給大家看，重複睇了100次的《倒轉地球》。圖1:獨唱版 圖2:合唱版」。

條片一啲都唔hea，揸咪唱仲有燈光特效，如同置身舞台一樣。而保錡嘅模仿能力都好高，瞪大隻眼都唔眨一下，表情、唱腔扮到足。小肥、J.Arie、張紋嘉等都有笑到喊emoji，但唔知當事人大宇見到會唔會嬲嬲豬呢？！