姜麗文為出碟圓夢令生活拮据 未想過叫爸爸幫手：憑咩用佢啲錢

現年35歲的秦沛女兒姜麗文（Lesley），在2017年簽約TVB後，近年演出機會不斷，在處境劇《愛．回家之開心速遞》演外傭Lisa；及近日播畢的台慶劇《星空下的仁醫》演母親角色，同樣備受讚賞。近日姜麗文接受商台《1圈圈星光背後》專訪，透露從沒想過要爸爸秦沛幫手「搭路」，她謂：「其實由細到大我對任何表演都有興趣，簽TVB係因為到17年做獨立歌手做咗好耐，又窮又好耐冇上電視，本身好想演戲，我係簽約嗰日後先跟爸爸講。大家都話爸爸會幫到，但我唔知亦冇想過，我唔介意角色大定小，有機會就已經好感恩。」

當年姜麗文和哥哥姜文杰組成兄妹檔Benji and Lesley闖樂壇，耗盡了20萬製作及推出有3首歌的細碟，但原來最終頭一年只有萬多元收入。談及經濟最難捱的時候，姜麗文指亦從沒想過要求爸爸幫助：「係試過窮到去超巿，想買一盒好想食嘅士多啤梨，價值5、60蚊都買唔起，係喊住咁走。我同阿哥無要求過爸爸幫手，因為知阿爸賺錢都好辛苦，特別依家佢都76歲，我哋憑咩花佢咁多年嚟儲咗嘅錢？佢應該用呢啲錢跟媽咪享受吓二人世界，自己生存到就冇問題。」