獨家丨姜濤「第九胎」揭盅零的突破跟AGA合唱新歌

2021-11-24 21:30

「人氣王」姜濤喺今年8月推出新歌《Dear My Friend》，兩個月後經已喺社交平台貼自拍照，預告即將推出「第九胎」新歌，又留言話：「九胎九胎九胎，滿腦子都是你。」但就冇具體談論有關詳情，搞到「姜糖」鬼咁緊張，猛留言話好期待。直至本月初姜濤繼續不停煲他的「第九胎」，留言話：「漫長的過程保持耐力慢工出細活」、「九胎錄到一半發現一首很好聽的歌，喉嚨癢唱一下。」據知原來「第九胎」係姜濤零的突破，因為呢首係同環球唱作歌手AGA（江海迦）合唱嘅新歌《I Know》，亦係姜濤第一首同女歌手合唱嘅作品。而兩人將於明晚（25日）錄影《Chill club》，首次喺節目中現身獻唱。

過往姜濤曾經同女歌手謝安琪、鄭秀文、李幸倪（Gin Lee）、林二汶等合唱過，但就未試過同女歌手有合唱歌。據知，姜濤和AGA互相欣賞，姜濤亦很欣賞對方嘅音樂才華，更有意做埋AGA明年演唱會嘅表演嘉賓，現場獻聲。昨晚（23日）姜濤仲突然出IG Story，留言話之後開個直播和大家交代一吓之後的事情，但就講明唔會係昨晚（23日）嘅事，令事件添上神秘感，而時間上正好同錄影完《Chill club》，公開「第九胎」好配合。

姜濤在2019年6月單飛出道短短的兩年，先後推出8首個人單曲《一號種籽》、《亞特蘭提斯》、《一天多一點》、《蒙著嘴說愛你》、《孤獨病》、《愛情簽證申請》、《Master Class》及《Dear My Friend,》，其中《蒙著嘴說愛你》MV點擊更突破千萬，今次將推出第9首單曲，大家都相當期待姜濤將會唱咩類型嘅新歌！而喺呢個時候出歌可以跟AGA進一步推高人氣，絕對雙贏。