陳煒風騷晒「八心八箭」求婚巨鑽 「𦧲飯應」嫁興奮失眠

陳煒（煒哥）昨日（21日）在48歲的生日會上答允醫生男友陳國強的求婚，今日首度以準陳太身份亮相公開活動，一臉幸福笑容、左手無名指戴上訂婚鑽戒的煒哥，大讚未婚夫是能付托終身的100分好男人，笑言自己是「𦧲飯應」；又甜絲絲透露以「八心八箭」設計的鑽戒內，暗藏與未婚夫的秘密故事，並許下愛的承諾。
煒哥甫現身活動即收到大家連環恭賀，甜蜜滿瀉的她不停多謝大家的祝福。問到準新娘的心情？煒哥以幸福的笑容說：「噚晚瞓唔到，因收到好多朋友送祝福，要忙住回覆大家，所以依家有啲暈暈哋。」

事前可知道男友會驚喜求婚？煒哥謂：「完全唔知道，因為每年生日都會同一大班朋友慶祝，所以唔會特別為意，聽講佢籌備咗一個月時間。（那刻有否感動落淚？）有呀，仲好開心有咁多朋友見證，同咁多人送祝福。（立即Say Yes？）係𦧲飯應，哈哈！（是否預計到會被求婚？）唔知呀，唔敢諗，驚唔係會失望。（男友有什麼值得點頭下嫁？）佢對我好好，以後我照顧佢嘅生活，佢照顧我嘅健康。（值得托付終身？）佢好好，100分。」
煒哥的無名指已戴上幸福的訂婚鑽戒，至於是否外傳的3卡就不清楚，表示是朋友設計，由兩隻戒指合二為一，外圍的鑽飾以「八心八箭」的切割，並隱藏了2人的秘密故事，非常有心思。
由於事出突然，煒哥表示有關婚禮細節還未有傾談過，婚後會不會減產也未想到，會否造人？她即回答：「吓！未諗過！」那麼婚禮會否交由未婚夫一手籌辦？煒哥說：「以我嘅性格應該都會參與。不過佢今次（求婚）就幾做到嘢，因為佢喺我心目中只係識救人同醫人，其他乜都唔識，估唔到今次會設計咁多嘢，好叻！」