賭命夫妻丨人夫玩到「有反應」 火火唔怕教壞人：感情進步咗

由火火和陳嘉倩主持的ViuTV真人騷《賭命夫妻》邀請五對夫妻玩遊戲贏取港幣10萬元獎金，挑戰人妻人夫的「定力」！節目播出後，即惹來大批網友炮轟意識不良、玩得太過火、畫面涉及色情以及歪曲道德等，直指「好黐線」、「根本係玩火」等。

28歲的Benson曾直認對PTGF、即口罩小姐Mangie有好感；昨晚（15日）播出的一集，Benson與Mangie繼續大玩曖昧，在船P上摸勻Mangie全身，還講「有味」笑話，Mangie指如果自己跌落海，Benson就算想救都「扯唔起我」，Benson即指男人遇到Mangie都會「扯得起」，內容相當大膽露骨。不少網民都洗版式留言鬧爆Benson，叫他放生結婚3年的老婆Ruby。

另一個挑戰肉體極限的環節，是要人夫戴住眼罩被5位PTGF瘋狂摸身挑逗，有限時2分鐘內，5位人夫即使面對極其親密的身體接觸，都沒有一個嗌停！之後製作組換上「老婆」上場扮PTGF，其中Dennis的太太Teris餵食軟糖咀嘴後，覺得Dennis有所反應，即忍不住當眾摑了老公一巴，並即場激動爆喊。

對於外界的批評，火火今日接受《頭條娛樂》訪問時表示相信夫妻早有心理準備：「明知咁多鏡頭，再鹹濕都唔會忍唔住，畀我就估係男人、一係自己老婆。嗰一巴我覺得係積怨積落嚟，一個發洩。」問可擔心教壞人？他說：「唔係好擔心，佢哋幾成熟同情比金堅，就係覺得打風都打唔甩，所以先想玩到呢個程度，so far節目拍完到依家，佢哋感情進步咗。」另外，有份幫手安慰人妻Teris的陳嘉倩，直認當時自己也有點手足無措：「傾落發覺原來佢哋兩公婆一路以嚟都有啲溝通問題，私下都傾咗成個鐘，火火以過來人經驗share返，我哋都袋咗好多嘢落袋。」對於節目被指玩出火，她指下星期會有婚姻輔導專家幫手解決問題。