【一見如故】合拍MV遊叮叮河齊𥄫靚仔　鄭欣宜勁羨慕Serrini S形線條

鄭欣宜（Joyce）新歌《先哭為敬》推出後好評如潮，早前她邀得有份作曲的Serrini（梁嘉茵）來一個合唱版《先哭為敬（尾班車Version）》，並包了一架電車遊叮叮河拍MV。收Demo到拍MV前，兩人一直都只是「網友」，直至拍MV日才終於首次見面，Joyce說：「我有睇Serrini嘅演出和MV，好鍾意佢嘅歌聲和風格，感覺我同佢好似來自同一塊料子裁出嚟咁，雖然各有風格但又好夾，所以我同公司講好想同佢合作，終於等到佢嘅Demo，一聽就好鍾意。」對於此曲本來為一位男歌手所寫，她說：「可能唔輸得嘅性格，見到『男人歌』三個字就偏要唱。」

合唱版MV拍攝當日，電車遊走銅鑼灣、跑馬地和中環，心情大好的Joyce未埋位已扭腰跳舞又風騷向途人揮手，被拍照時更擺甫士任影唔嬲。Serrini初時比較含蓄，但電車駛到跑馬地運動場附近時，Joyce與Serrini手指指又細聲講大聲笑，原來她們在𥄫靚仔。初次見面，Joyce一見面就讚Serrini：「好羡慕佢條腰，我冇呀！」Serrini亦讚對方皮膚好靚兼佩服她的自信，Joyce坦言：「我試過素顏戴帽，以為冇人發現，結果一樣被人認出，咁算啦不如我擺埋甫士，最緊要影得我靚啲！」