【獨家】北上三日拍5廣告掘金　趁聖誕節揈錢　張栢芝連掃5鋪買禮物冧仔

40歲張栢芝自2011年跟謝霆鋒離婚後，獨力湊兒子Lucas和Quintus，前年11月驚爆誕下神秘第三胎「小王子」張禮承（Marcus）。為了賺錢養家，近年栢芝都Keep住中、港兩邊走，早前她便北上於3日內一口氣拍了5個廣告，火速吸金！雖然密密接Job，但出名「廿四孝媽咪」的她唔使開工就會陪3個囝囝，以往逢過節更會一家出埠度假，惜今年疫情蔓延全球，聖誕只能焗困香港，為補償3個寶貝仔冇得周圍玩，栢芝日前就單拖到又一城狂掃玩具和零食等等聖誕禮物𠱁囝囝，一口氣行足5間鋪的她最終買到要Call人幫拖拎戰利品，認真誇張！採訪：譚壹致

一向好識享受生活的張栢芝出名是「天生購物狂」，早年自爆試過一個月簽200萬元卡數，更於一日內買車又買樓，非常豪爽，對住3個寶貝仔自然絕不手軟，上周一（7日）趁聖誕前夕，剛於內地旋風式掘金的她，就前往又一城入貨買禮物。當日下午2時，《頭條日報》記者發現穿上一身自家品牌SeeCeciStreet運動裝、戴上黑超及口罩的栢芝，抽住個環保袋獨自在玩具反斗城揀玩具，她先執了各99蚊的3個幻彩跳球和一Pack 3個足球、籃球造型波仔，之後又拎了3架各39.9蚊的Tomica車仔；最後去到收銀櫃台畀錢時，又忍唔住擸多支39蚊的吹泡棒和兩包各26.9蚊的蒟蒻，合共盛惠608.5元。

人人有份
隨後栢芝落到1樓的內衣專門店，估計是一早訂好款式嚟攞貨，在等待期間，她全程機不離手狂篤Message又錄音，未知是否被囝囝催返屋企呢？見貨未到，栢芝又爭分奪秒殺上2樓mothercare，並於短短10分鐘掃走大袋奶嘴、衫仔等畀Marcus。回內衣店取貨後，身上掛住4大袋戰利品的她，繼續到美珍香買臘腸、豬肉乾等，店員見她咁狼狽，仲幫手將啲嘢食塞入大環保袋中。以為栢芝打算盡興而歸，豈料在路中間企咗陣，忽然殺出兩名職員嚟幫拖，攞咗大袋ZUCCa衫給栢芝的她們，幫手拎重嘢再送她落停車場，沿途經過一間護膚品牌專門店，職員們還企喺門外等她Shopping，認真貼心。