【維港會】母親患病為慳錢帶飯遭同事笑寒酸 慳家男：我想咁窮㗎？

不少人為了慳錢或健康都會自己帶飯。不過有網民在社交網站專頁「辦公室日報」投稿分享，指有男同事每日帶飯，都被「口痕友」嘲笑，指他的飯菜寒酸，終於有一日男同事忍無可忍大罵對方，並道出心酸理由。男同事最終辭職，並直指「唔想喺度打開個飯盒都好似做錯事咁。」帖文引起網民熱論。

有網民在「辦公室日報」fb專頁投稿，分享一名年約20多歲的前同事阿昌帶飯經歷，指對方入職時已經是個樸實、不用名牌，連電話螢幕有裂痕都繼續用的慳家男，同事相約聚會時，阿昌都會推卻，初時大家都以為阿昌為人比較內向，但後來阿昌坦白稱自己家中經濟有困難，故希望慳錢減少不必要的開支。

阿昌每日都會自己帶飯，怎料就惹來口痕同事取笑他飯盒清淡，沒有肉食。樓主亦替阿昌出頭，反駁口痕同事指「食清啲有咩問題呀？關你鬼事咩！」，但口痕同事不但未有收口，有次更揶揄阿昌沒有交家用，稱「你阿媽煮啲咁嘅嘢畀你食嘅，會唔會寒酸咗啲呀。」阿昌聞言即隨大聲反駁「你講乜X嘢呀！我屋企煮啲咩關唔X關你事呀！窮唔X得呀！我想咁窮㗎！我阿媽有病呀！佢想有病㗎？」，又扯起對方衣領，非常激動。

惟事後口痕同事未有道歉，更死撐話：「講下笑之嘛，咁小器，唔玩得！」，其他同事見狀都替阿昌感不值，幫口鬧口痕同事，連老闆亦出現做和事佬。不過阿昌堅持辭職，直言「唔想喺度打開個飯盒都好似做錯事咁。」幸好阿昌很快便尋獲新工作。

帖文引起不少網民留言，有人對阿昌經歷表示同情，「大家如果見到同事咁樣，可唔可以唔好笑，請下人地食嘢或者加餸? 蟹柳條鹵水蛋都好吖」、「昌媽抱恙都準備飯盒，阿昌個愛心飯盒，其實無價」，亦有不少人批評口痕同事自以為風趣幽默。