【悶到狂出Po】呻冇得出街學打鼓做瑜伽　關之琳留家做Gym搵愛犬作伴

近日本港疫情嚴峻，不少人都聽專家話留家避炎，現年57歲的關之琳都唔例外，不過唔知係咪宅喺屋企悶得濟，以往間唔中先喺社交網出Po的她，最近開始活躍起來，繼前日於內地社交平台上載一段在睡房拍攝的「變裝」短片後，今日凌晨又於IG連發兩Po。在第一個帖文中，關之琳分別貼出一段打鼓及一段大玩空中瑜伽的短片，並寫道：「Miss the activities , terrible Covid 19 #druming #aerialyoga #badminton（想念那些活動，可怕的新冠肺炎）」片中，戴住口罩的她不論打鼓或學習凌空倒轉的瑜伽動作均做得有板有眼，連好友汪詩詩都留言讚：「so cool!!」

雖然冇得去Studio上堂，但關之琳都冇因此鬆懈到，仍然好努力喺屋企做GYM，在第二個帖文中，她更分享了一段在廳中做「Mountain Climber」動作的影片，片中仲有愛犬瞓喺隔離陪伴，其間關之琳做做吓更搞笑地向狗狗叫「喂」，可惜愛犬好鬼懶，繼續無動於衷瞓喺度。