星島日報

與施匡翹新冠狀肺炎病毒指數接近零 Apple姐:冇事就會放我出院

2020-07-19 13:57
Apple姐與旗下歌手施匡翹至今沒病徵,驗出病毒量也很少,有望早日出院。
Apple姐與旗下歌手施匡翹至今沒病徵,驗出病毒量也很少,有望早日出院。

在男友麥德羅確診感染新冠肺炎後,劉麗萍(Apple姐)和旗下歌手施匡翹,與宣傳人員阿佳亦相繼確診。已入院隔離一日的Apple姐和施匡翹今日(19日)依然沒有任何病徵,今朝醫院再為兩位進行深喉唾液檢測,新冠狀肺炎病毒指數很低接近「零」,所有檢查報告都顯示逐漸康復,Apple姐及施匡翹多謝各位傳媒朋友及每位朋友粉絲關心及問候,令大家擔心及受影響的所有同行及朋友,兩位深感歉意,祝福大家平安無事及健康!
仍在伊利沙伯醫院隔離病房的Apple姐說:「其實我精神冇乜問題,冇發燒,血壓都正常,亦冇喉嚨痛冇咳。由開始呢個禮拜我都冇事唔覺得自己有病,所以我都係好正常咁工作。由於15號之後禁聚令開始我都少咗出去工作,亦曾經有接觸過啲藝人,但唔係好長時間,少少幾個字有啲嘢交代,因為我唔知自己確診,直到禮拜五晚發現我男友麥德羅確診咗,我先至一齊去醫院驗,到禮拜六噚日朝早先知自己確診,即刻都叫所有接觸我嘅朋友去檢驗,好彩好多人都冇事,但好不幸施匡翹都確診咗,我都好抱歉,同埋有個同事都確診咗,希望大家冇事,因為今次疫情好嚴重,希望快啲過,我都會努力對抗呢個病毒,暫時我身體都係好OK,希望大家樣樣平安,真心祝福大家,多謝。」
隨後Apple姐再以語音短訊報喜:「啱啱收到醫生打畀我,佢話其實我嗰日驗嘅病毒好少,依家入咗嚟,血壓、溫度都正常,驗咗啲血無事,個肺又無事,口水都係好少,近乎冇,佢哋再觀察吓,冇事就放我出院;我叫屬於低風險感染者,希望其他人都無冇事。」
另外,Apple姐發聲明:「本人Apple Lau於昨天(7月18日)被確診新型肺炎,而事源於上星期五(7月10日)晚上,本人男友麥德羅先生曾於尖沙咀某酒吧舉辦網上音樂會,現場亦有招待少量粉絲朋友,而於音樂會約兩天後開始感到輕微胃痛,懷疑感染腸胃炎,麥便於7月13日到院求醫,並遵從醫生建議,順帶自行採集深喉唾液樣本並交至指定化驗所。

「由於醫生指若確診將於翌日收到通知,且麥於翌日已沒感不適,及精神狀態良好,亦沒收到化驗所或相關部門之任何確診通知,故誤以為只是一般腸胃炎。不料直至7月17日星期五晚上,麥才收到電話通知證實確診。由於我是密切接觸者,故亦需一併送院化驗並通宵等候化驗結果。我並隨即(通)知本人之公司團隊及旗下藝人盡早進行化驗。直至昨天7月18日早上我也證實確診,並正於處隔離病房中治療,現時並沒任何病徵,而其實由開始到現在我也沒感任何不適。

「本人於最近一周曾與部分公司團隊及藝人進行會議,而本公司一名宣傳部同事及藝人施匡翹於今(昨)天得知本人確診後便隨即到醫院進行化驗,並相繼不幸被確診,當中施匡翹並無任何病徵,而以我的認知,二人感染源頭有機會是源自我們間之接觸。
「此外,鑒於近日公司宣傳部及藝人曾經於電台及電視台進行宣傳工作, 故很可能於潛伏期間已不幸將病毒散播,本人及同事們已即時盡最大努力通知各個可能受到影響之團體及人士,務求最大程度減低病毒繼續傳播之風險。
「本人明白是次事件為各媒體及大眾帶來不便及擔憂,本人感到萬分抱歉,亦非常感謝各位送上祝福的朋友們,希望各位身體健康,同心抗疫。」

Apple姐與旗下歌手施匡翹至今沒病徵,驗出病毒量也很少,有望早日出院。
Apple姐與旗下歌手施匡翹至今沒病徵,驗出病毒量也很少,有望早日出院。
Apple姐抱歉感染給施匡翹和宣傳人員。
Apple姐抱歉感染給施匡翹和宣傳人員。


施匡翹亦以語音短訊詳述情況:「我依家個情況係無乜大礙,由噚日開始收到通知,公司同事確診咗,之後我就即刻換衫去醫院檢查,等咗大概5個幾鐘就知道結果,我就係有事要入院隔離同埋觀察,當事係完全無唔舒服同埋病徵,今日我感覺暫時都係良好。我要多謝大家關心,噚日一時間太忙亂唔識得處理,因為當時我自己一個人去急症室求診,依家我情況穩定正常,等緊觀察耐啲睇吓情況點。」
施匡翹續謂:「我經理人Apple姐嘅深喉唾液樣本check到病毒近乎零,即係佢都好快無事,佢可能都係觀察多幾日,我就聽日再去檢查,驗血、X光都顯示我係正常無問題,我精神都良好。有一樣嘢係要講聲唔好意思,令到娛樂圈咁多人都咁擔心,成年件一直以嚟到依家我無任何病徵,我無任何唔舒服,我同經理人都係,所以真係無諗過會發生呢啲事,祝福大家早日康復,如有接觸我哋嘅人盡快去檢查,大家都平時都一定要戴好口罩,小心病菌,祝福Robert哥、Apple姐同佳哥早日康復。」

施匡翹亦為令娛樂圈大家擔心講聲唔好意思。
施匡翹亦為令娛樂圈大家擔心講聲唔好意思。
蔣嘉瑩與囝囝及工人姐姐今晨已收到醫院報告,全部呈陰性沒事了。
蔣嘉瑩與囝囝及工人姐姐今晨已收到醫院報告,全部呈陰性沒事了。


至於另一位接觸者蔣嘉瑩與囝囝及工人姐姐今晨已收到醫院報告,全部呈陰性,沒有感染!今晨與囝囝及工人姐姐已出院,她鬆一口氣及感謝所有傳媒朋友及粉絲:「我無事啦!噚日至今晨不停收到大家問候及關心,我好感動,希望所有傳媒朋友及同行及所有人都平安無事,疫情快啲結束。」

最新回應

關鍵字

相關新聞

熱門文章