難忘兒時被屈偷嘢獲信任 王梓軒越洋送歌冧媽咪

今日係母親節，身在洛杉磯嘅王梓軒雖然未能返港同媽媽慶祝，但孝順仔越洋送上禮物，同老友Jon Ong聯手翻唱咗Ben Folds嘅《Still Fighting it》，個MV仲有兩段童年時同媽媽嘅珍貴片段，好溫馨：「呢首歌係講父母對小朋友嘅期望同愛，首歌令我聯想返喺我成長過程中，媽咪對我嘅教導同愛護，就算𠵱家好困難，但我哋都繼續追尋夢想。」


談及MV中的童年片段，梓軒話：「我細個都幾百厭，12歲時有次我去機鋪打機，手快快攞咗隔離小朋友啲代幣嚟『救命』，個小朋友好大反應話『偷嘢！偷嘢！』我真係冇心嘅，我即刻還返俾佢，當時阿媽冇喺人哋面前鬧我，仲維護我話『一定係誤會，我個仔唔係咁！』但一返到屋企就真係嚟料喇！呢件事𠵱家仍然歷歷在目！」