星島日報

為DSE考生打氣 方健儀晒26年前文青look准考證

2020-04-24 20:45
方健儀、余香凝、Ben Sir貼上圖文為DSE考生打氣。
方健儀、余香凝、Ben Sir貼上圖文為DSE考生打氣。

中學文憑試(DSE)終順利於今日如期開考。首日舉行的是視覺藝術科考試。唔少藝人都喺社交網貼相留言為考生打氣,而前新聞主播方健儀(Akina)亦上載1994年前的准考證,提醒考生做好應考準備,她說:「准考證x2、身份證、口罩、健康申報表、文具、糧水……準備好未?考?唔考?終於考!DSE同學仔,順利、努力、盡力而為。」

當年的方健儀是四眼妹一名,好有書卷氣,唔少網民留言指她個樣冇變過,又讚她係高材生樣,有心水清嘅網民更認出係沙官時代的准考證。

之後方健儀再貼同年喺香港公園影嘅「天生麗質」圖,出題目嚟考吓大家,留言說:「話時話,呢兩張相都係1994會考嗰年影,真人就係天生麗質,點解同准考證嗰張差咗啲啲啲啲嘅?監考員點解比我入場考試嘅?」
A. 因為考試前食錯嘢;
B. 因為考試前令人面容緊張,考試後令人神采飛揚;
C. 因為E沖C化腐朽為神奇,啲光打到連暗瘡,甚至個鼻都冇埋;
D. 以上答案皆是。

網民大讚她清麗脫俗,好清秀,有文青feel,還大讚她幾時都咁索。

而余香凝(Jennifer)則貼了《非同凡響》中學生妹造型來勉勵考生:「知道一切不容易 #dse考生加油。」有網民指余香凝似她班中的校花。Ben Sir(歐陽偉豪)則上載身穿恤衫和打呔的照片,表示會負責監考,留言說:「各位dse同學:若然你喺學校見到我監考,你無需驚訝,亦唔需要同我打招呼,因為我本來就係屬於課室,服務各位家長嘅子女。laides(ladies) and gentlemen, I'm a student servant.」

方健儀、余香凝、Ben Sir貼上圖文為DSE考生打氣。
方健儀、余香凝、Ben Sir貼上圖文為DSE考生打氣。
方健儀被指樣貎多年沒有改變。
方健儀被指樣貎多年沒有改變。

最新回應

關鍵字

相關新聞

熱門文章