唐詩詠貼中三舊照　王浩信回應引網民催拍《不懂撒嬌》續集

唐詩詠跟大隊近日宅在家冇乜嘢做，執居成為打發時間最佳方法。呢日她就翻出舊相，貼出中三時同朋友去沙灘玩留影，並留言：「翻開舊照片發現中三的我　然後　影咗15分鐘都係好朦　最後發現原來張相用咗磨砂過膠　究竟邊個發明磨砂過膠咁聰明　佢就好比今日嘅美圖秀秀　係咪因為咁　個人立刻白雪雪咗呢」相中見到她着住牛仔衫褲加上一頭清爽短髮，雖然打扮相當男仔頭，但清純靚樣已經現雛形。網友亦大讚她：「由細靚到大！」不過最驚喜是好拍檔王浩信亦有留言：「Saving哥當年喺ICQ約咗佢但係最後冇出現嘅嗰個人……不懂撒嬌的女人之 番外篇」之後唐詩詠再回應：「佢掛住上網打機，有出到去」即時搞到網友好興奮，紛紛叫他們快啲開拍續集，其實繼《不懂撒嬌的女人》後，兩人早前已再合作過《解決師》，一樣好受歡迎，相信再合作應該一樣有捧場客。