【頭條獨家】前電波少女變幸福少奶 汪琳同餅印女街巿親子樂

女藝人星途麻麻唯一好出路，似乎就係嫁個有錢人。汪琳08年下嫁商人張忠弦（Joey）後，11年誕下囡囡梓彤（Kesha） 決心離場做全識少奶奶，去年11月年再生埋囝囝Lewie湊成好字後，似乎更加享受呢個身份，日前見她同餅印囡囡行街巿，兩母女全程有傾有講，Kesha仲幫手揀生果，親子時刻好鬼溫馨。 採訪：梁志明

生完未收身
汪琳11年誕下囡囡Kesha，已開始減產，13年約滿後便專心相夫教女，原來她一直想懷第二胎，可惜14年一度小產，不過她未有放棄，去年終得償所願11月再為老公誕下6.8磅囝囝Lewie 湊成好字。以往都會湊囡囡出席公開活動的她，有了Lewie更加少現身，可能囝囝年紀太細比較困身。

不過，Lewie現已一歲大，汪琳接Kesha放學都可以親自出馬。日前黃昏6點幾，汪琳接完囡囡放學，齊齊去鵝頸橋街巿掃貨，生完一年的汪琳似乎仲未收身，仍然面圓圓，但Kesha同佢成個餅印咁，仲要齊齊帶住個圓眼鏡，夾到暈。見她們主力揀生果，睇完舖頭再行去路邊檔。8歲的Kesha亦好叻女幫媽咪手揀蘋果，汪琳亦細心講解點樣揀，全程相處融洽，行街巿變成親子樂。