許廷鏗新碟藏10個封面 重拾初衷分享開心回憶

許廷鏗到尖沙咀宣傳下星期推出的新碟《拾》，他指新碟有10個封面，但不用擔心要買10隻咁多，因為每隻碟已有齊所有封面，大家可摺出自己喜歡的一款。由於現在要做有10首歌的大碟絕不容易，他說：「人生有幾多個十年？呢個係我第一個十年，《拾》除咗表示有十首歌，還代表拾回初衷，希望同大家分享開心嘅回憶。」

他續透露有計劃開音樂會，正在構思以甚麼形式舉行，並笑稱不一定要大製作，可以去一些有回憶的地方開騷，又指早前與吳業坤、胡鴻鈞一起在社交網開live大受歡迎，他笑言：「Joyce（鄭欣宜）都有問我點解唔搵佢，我話同佢太熟啦！」他希望日後能與更多不同的單位合作。