被指盲撐警方 黎瑞恩：完全不畏懼不畏縮

反對《逃犯條例》修訂的示威不斷，並爆發多次警民衝突。黎瑞恩（小恩子）早前就浸會大學學生會會長方仲賢在深水埗購買雷射筆期間，被警方以懷疑「藏有攻擊性武器」為由拘捕一事發表意見，被網民指責盲撐警方。小恩子昨日再在網上發文，指自己被人唾罵及詛咒，但直言「完全不畏懼亦不會畏縮」。

小恩子昨日下午在社交媒體上發文，指「呢段時間香港發生好多事，唔單止社會出現咗好多分裂聲音，喺我呢度亦出現咗好多意見不同嘅朋友，有唾罵我嘅，甚至咀咒我嘅，我係完全不畏懼亦不會畏縮。」她又指，「但我好感恩有好多大家睇法唔聲音唔一致嘅Fans及朋友，雖然大家所感受嘅嘢完全背道而馳，大家理論嘅時候還是好努力保護及維護我，我係好感動，好想多謝一直真正愛錫及了解我嘅歌迷及朋友。」

她亦表示，絕對接受眾人有不同感受及意見，並指「唔係要大家跟我嘅聲音相同」，只是不希望看到朋友及家人之間互相傷害或反目。她續指，「大家同坐一條船，都希望風平浪靜，我相信任何聲音嘅朋友都係想香港好，都係為咗守護下一代嘅未來，希望大家可以理性爭取及表達，反對暴力，及對警署、社會設施嘅破壞，我會繼續努力做好本份及工作，希望香港也一齊加油！」