順勢而飛路合起飛

羅富全開倉五季成績優異，尤其首兩季在泥戰搏殺準繩，首季贏十五場，第二季十八W，雖然之後三季頭馬只得單位數，然而今季回復強勢，目前已有十二W斬獲，加上擁有不少泥地好手，可望再次成為泥地王。

第一場第四班一六○○米草地：「仁仁之寶」未上陣時莫雷拉已𥄫實，而且又一再主課，初出拼入冷位亦表現不俗，第三仗扳上千四更迅即坐正，交出凌厲衝刺且贏夠個多馬位，姿態出色。以為「仁仁之寶」之後可以扶搖直上，誰不知苦戰一年有多未能再贏，最弊不是力有不逮，而是一再跑近，無奈跑法太過被動，受制於形勢以致後上不及。

「仁仁之寶」在三班多次交出好走勢，重返四班必定有賺，就算上仗純粹出戰變化地場地不合，非實力不逮。今仗終於搵到潘頓，冠軍騎師分分鐘會改變跑法，可能唔再留太後，再看「仁仁之寶」埋門出跳愈見淡定，情緒不斷轉好，勝利分子值得看好。

第八場第三班一二○○米泥地：「順勢而飛」乃上季插三班自購馬，季尾上陣三戰兩仗入位已露一手，今季進度起飛，首四戰便交出兩捷佳績。之後一度連敗三仗，幸好羅富全不斷變陣，替此駒改動配備，並且轉戰泥地，結果四七二場初跑同程拼殺入Q腳，跟手一戰八十分馬唔跑三班賽事，越級挑戰二班賽落重飛得手。

近三仗「順勢而飛」三甲不入看似表現一般，實則大前仗田草排大外檔，留到極後劣勢一樣追得好，至於近兩仗同樣跑不合變化地，但一樣輸得接近，同時顯示現評分未達止境。目前泥地最具威力，今仗難得路合腳法，加上對手缺點極多，稱得上形勢大好。