蟲草之凰季尾犀利

黎廄谷戰成績遠勝田草及泥地，原因在於黎廄置身奧運馬房，若果跑日賽，大多馬匹由河畔跑道策騎抵達到機坪，繼而再入亮相圈，騎起心火兼用力多，因此最近不少參與田戰的黎廄馬匹，都改用搭馬車到當地。

第二場第五班一○○○米：「創福威」昔日從未上名，只跑過一次第四，今季轉投黎廄即判若兩駒，首戰即交出勝仗，之後四戰全躋身前四，演出變得穩定可靠。有脫胎換骨表現，關鍵在於馬匹的健康全面養回，因為「創福威」是一匹細馬，更弊的是過往常常唔食料，以致馬身長期偏瘦，自然難有好狀態。

黎昭昇搞好了「創福威」腸胃問題，加上評分處於有利境地，今季順利交出佳績，最難得除了贏馬一仗排一檔，對上四戰全排外檔形勢不利。更佩服是黎昭昇及馬主的耐性，既然「創福威」獨擅同程，於是每一次安排出戰，正如今戰等了個半月，一心一意等待這個最佳路程，相當有誠意。 

第三場第四班一六五○米：「蟲草之凰」上季尾漸入佳境，首次贏馬雖靠天雨之利，但走位12-12-11-1，仲要輕勝個多身位唔簡單，接戰重返四班更犀利，同樣輕勝贏一個馬位，而且跑出一分三十九秒四二極佳時間。

以為「蟲草之凰」今季可再進一步，誰不知未能再贏之餘，上名更寥寥可數，不過相對地連場落敗，同時獲得減分不少，正如上仗重返五班立即復現虎相，該仗若非步速太慢兼本身孭頂磅，已爆出十倍冷W。無疑「蟲草之凰」跑番四班形勢不及上次，幸好今戰對手多有缺點，再看「蟲草之凰」最近試多課，備戰積極不已，加上本身季尾極具威力，上季尾兩度建功，今次狀態托弗可睇高一綫。