隱形翅膀步勁力足

昨朝仍有不少參戰馬出跳，大部分騎師亦有到場操馬，精采鏡頭尚算不少。現將所見報道如下：
「隱形翅膀」助手跳兩段，雖然較遲轉腳，但試來神閒氣定唔急唔搶，出腳步挺順暢勁度足夠，狀態已操勇。「喜快」戴頭罩由助手跳兩段，大大步走過，好輕身落腳爽朗有力，外觀無問題。 

「紅旺」黃俊拍「其利斷金」田泰安草閘跳兩段，前駒一直領前，少少搶口但步伐整齊，馬身唔瘦，觀感尚可，後駒汗濕甚多，追勢不強反應可以更好。

「得勝多」陳嘉熙拍「敬禮」梁家俊草地跳兩段，前駒大半程領先，走勢硬淨力度未減，多跑下馬身收得壯，後駒戴頭罩，末段追上但勁勢唔算強，神態平淡，狀態一般。 

「晴王」助手跳兩段，台型未算吸引，勁度亦一般，唯一可取是走來規矩。 「志勝時機」助手跳兩段，跳來仍係威係勢，健步如飛，火力未減半分。 「運高八斗」戴頭罩由助手跳兩段，神態軒昂，馬身比之前更靚更壯，勝後再進一步。 「極速飛彈」戴頭罩由助手跳兩段，主動躍躍欲試，火氣好到不得了，馬身脹卜卜。 「專一」助手拍「卓諾人生」跳兩段，扣住慢走平平淡淡，火力唔夠亦欠缺朝氣。 

「天天得樂」副練跳兩段，試來神氣十足，步爽力勁身又靚，狀態長在勇境。 「縱橫天下」戴頭罩由助手跳兩段，神情專注落腳輕快，馬身收得結實展現綫條美，狀態不錯。
佳運財暗火展現

「佳運財」戴眼罩及頭罩由田泰安跳三段，扣到實暗火展現，神色好番好多，毛色有光澤，狀態已操勇。「競駿天下」周俊樂跳兩段，戴眼罩及頭罩及額箍，雖然上仗入位，但復課未見太大進步，今課仍舊不斷頭岳岳難操控。 「繼續精彩」馬雅跳兩段，一貫搶口要小心操練，神態唔錯，外觀吸引。 

「齊喜」戴頭罩由馬雅跳三段，仍戴着雙杆型口鐵，口勁不算重，可是出腳力度普通。 「精算其然」戴頭罩由楊明綸跳兩段，慣例伸長馬頸唔太好睇，但落腳輕巧流暢，論態算是及格。 

「能文能武」戴頭罩由助手跳兩段，輕鬆完成唔急唔搶，動作唔再論盡，出腳利落，予人煥然一新之感。 「智勁駒」戴頭罩由周俊樂跳兩段，跑姿硬崩崩，前腳出得好直，未夠放鬆。 「禪勝寶駒」戴頭罩由馬雅跳兩段，試來好收斂唔再急口，灰馬身又夠壯周身肌肉，單講狀態好駟正。