神朗金剛步勁力足

昨朝仍有不少周三參戰馬進行試跑，主要來自葉及呂廄，當中不乏勇馬，現將所見報道如下： 
「喜駿駒」助手跳兩段，神情專注雙目有神，落腳輕快充滿彈力，外觀亦省鏡，狀態出色。 「友心友型」助手跳一段，慣性急口頭擰擰，不過唔亂步伐整齊，神態活躍有火有力。 

「神朗金剛」助手跳一段，神閒氣定唔急唔搶，步挺順暢勁度足夠，唞夠操足狀態有進無退。 「晉神」助手跳一段，韁口敏感馬試得淡定，馬身實淨唔瘦，神態對辦饒惹朝氣。 

「超額認購」戴頭罩由助手跳兩段，依然充滿朝氣，好輕身落腳爽朗有力，保持有餘不遜勝時。 「電訊犇豹」戴頭罩由助手跳兩段，沿途搶韁人馬角力，但出腳唔亂整齊，身色亦靚，近況極佳。 

「榮冠大道」助手跳兩段，年紀雖老，跳來仍係威係勢，馬身脹卜卜，狀態一直在上佳水平。 「尊才」助手跳兩段，戴面箍，順暢走過而已，唔太起勁火氣一般，灰馬身則幾粗壯。 

「威進駒」戴頭罩由何澤堯跳兩段，從容走過，步穩力足神態唔錯，毛色亦潤澤，老而未頹。 「馬爾代夫」霍宏聲草地跳兩段，大半程擔高頭走，雙目有神，馬身依舊好壯，狀態長期勇銳並無疲態。 

「幸福至上」潘頓草地跳兩段跳，走勢急勁，神態威武充滿氣勢，勇銳之餘不斷進步。 「財駿」戴眼罩由田泰安草地跳兩段，愈走愈起勁衝刺凌厲，落腳又爽又輕快，火力充足，全面回勇。 

「歡欣福星」陳嘉熙跳兩段，無之前咁急，但也說不上吸引，神態平淡更有點重身。「黃腳鱲」戴頭罩由莫雷拉跳兩段，跑姿唔好睇，不過愈來愈專注，精神爽利，不斷進步。 

「威威鬥士」戴頭罩由潘明輝跳兩段，馬尾短短好易認，論態仍在上佳水準，身壯出腳勁度充足。 「威武覺醒」戴頭罩由何澤堯跳兩段，向來懶性甚重，平淡走過唔緊要，更弊的是甚為重身，翻步欠利落，欠缺好感。