威力飛馳來者不善

賀賢目前已贏夠廿一W，達到馬會所設的及格指標。雖然如此，未來兩個月仍要留意賀廄馬，因為練者喜愛在季尾出擊，尤其今晚出馬既多又惡，要倍加留意，「威力飛馳」更是信心之選。 

第三場第五班一八○○米泥地：「威力飛馳」自購馬上季偏三班起步，曾試過連續三仗拼入前五名，其中一仗以馬頸位飲恨，可是之後一直備受喘鳴病困擾，季尾唯有進行閹割手術。做完手術後要時間復元，因此今季大多時候陪跑，不過始終有質素，隨着減分已多，大前仗跑第四重現朝氣，上仗落班強配熱捧，更取得久違上名滋味，若非入直路一度受困遲望空，已交出頭馬了。

「威力飛馳」今仗改攻泥地，合適與否未知之數，不過放棄下周三谷草二千二，寧願選戰今仗動態特別，再看今晚賀廄強陣應戰，更肯定捨草爭泥，來者不善。

第五場第四班一二○○米泥地：「電子兄弟」今季首次上名，之後幾仗乏善足陳，直至前仗初跑泥地加眼罩再有好演出。事實上，該仗賽前試泥閘進步不少，加上「電子兄弟」同父馬大多擅跑泥地短途，本身逾千二磅又夠噸位，適合泥地短途的機會好高。

上仗「電子兄弟」再接再厲，捧到二十五蚊信心十足，然而早段同「友盈友福」鬥放，用力太多下末段勁勢大減，當然本身仍年輕，還未有足夠出賽經驗，也是熱倒的原因之一。目前「電子兄弟」分數必有利，決心補中戰意亦好，最重要今次快馬只有「中華威威」，而其負磅又比「電子兄弟」重得多，形勢大好之下，有力贏馬補中。