金碧科五班佔優勢

薛恩騎功好唔好見仁見智，但若非大賽場合，又或出策公認的好馬，平常賽事此子多數能交出不俗表現。今日有多位騎師停賽，薛恩手執不少惡馬有望交出佳績，值得留意。

第四場第五班一四○○米：「金碧科」前季配薛恩贏馬，上季人馬兩度合作，雖然未能再添頭馬進帳，但一仗跑第二、一仗輸三個馬位。相隔近十個月之後，「金碧科」大前仗與薛恩再度攜手果然有計，取得久違勝利。記得當日是薛恩的大奇迹日，騎者全日取得四W佳績，而他出策時「金碧科」亦順風順水，入到直路順利揾到空位，無可否認贏馬的確有運，不過走位12、11、10、1，能夠留到極後一攻而破唔簡單。

過往在四班「金碧科」曾多番跑得接近，包括上仗跑第四，今仗重返五班佔盡優勢，揾番薛恩亦表明心意，再看今戰只有「堅有料」贏過，值得看好。

第五場第三班一二○○米：「五門齊」在上季中來港，季尾交由莫雷拉試閘，今季雷神試多兩課，走勢一課比一課出色，初出時有八倍，皆因「包裝長勝」被捧到十四蚊。

落到場「五門齊」不落下風，甚至差點擊退「包裝長勝」，該戰前列馬隻隻勁，第三至第五名「喜譽寶」、「樂滿貫」及「心之行」，之後全部都有馬贏，合共六次上陣出三冠一季一殿。出於強組的「五門齊」，上仗卻只跑梗頸四，然而強如「加州星球」當戰頭兩段放到四十五秒一七，也未能頂到尾跑第二，「五門齊」能夠全程快跟下未有腳軟，尚要負重磅僅負，表現相當犀利，今次只要在陣上交出應有之水準，有力在前列歸來。