赤馬雄風穩操勝券

季內跑過已開氣的馬威力大增，剛戰賽事就是最佳證明。今戰有多駒均在季內出過賽，不少更有好表現，正如「赤馬雄風」和「管得掂」，同樣乘勇出戰首本路程，如無意外可前列歸來。

第二場第四班一六五〇米：「赤馬雄風」上季在605場次改攻谷戰，意外地找到潘頓披甲，無論路程及配搭均蠢蠢欲動，仲要落重飛果然有計，首度上名入Q只輸半個馬位。

希斯見「赤馬雄風」大步又夠氣，接戰變陣改攻一哩，練者眼光獨到，結果此駒輕鬆坐正，之後更贏多兩場，包括重返四班繼續建功，氣勢一時無兩。今季「赤馬雄風」首戰熱倒看似失望，實情出戰路短千二，並非首本一哩，純粹安排大馬熱身開氣，落敗毋須介意，今戰才是目標所在，同場快馬又少，形勢大好穩操勝券。

第五場第四班一二〇〇米：「管得掂」上季初贏馬水準甚高，挫敗之後兩勝並贏三班的「好好彩彩」。二月十六日「管得掂」試閘流鼻血，唞夠唞足後在上季尾復出，久疏戰陣仍有好表現唔簡單，尚與今季繼續入Q的「中華威威」鬥到旗鼓相當，賽績實淨到痹。

雖則「管得掂」再出只跑梗頸，但考慮到當晚大利後追馬，本身跟前吃虧，能跑第四已及格，今季首戰檔勇路合繼續熱捧，但大家忽視了未做大閘，兼賽前有一課跳草地扭計，最後仍上名是高難度之作，亦再次肯定目前評分極着數。已開氣狀態當然更好，演出穩定路程合適，四班惡馬篤定補中。