「翡翠劇院」贏馬補中

或許蔡約翰攻勢放緩關係，近期的莫雷拉成績相當不濟，對上八次賽事更從未贏過騎師王，對比過往平均一點五次賽事就贏一次，表現簡直是天淵之別。老實講，筆者在陣上看不到雷神有何不妥的發揮，每場賽事都見他盡可能做到最好，成績大幅度下滑全因座騎質量大跌，也可能同佢揀錯馬有關。

第一場第五班一二〇〇米泥地：「翡翠劇院」爛船姑且有三斤釘，縱使有點老退迹象，但落到五班點都佔有優勢，初跑五班一仗即拼入Q位，之後兩仗均排外檔，大前仗搶放唔掂，前仗留後又太被動，落敗不作準。現時「翡翠劇院」已減夠分時刻可勝，姚本輝有幸接手行運醫生醫病尾，雖分數大利，輝哥依然相當謹慎，接手此駒後做足準備操得夠辣，同時四月十一日直路賽報名做後備，攞定出賽優先權，確保上仗必定正選。不過千算萬算，卻算唔到會排大外檔，相對檔差劣勢都跑第二，可見轉倉後已全面振作起步。早前「翡翠劇院」出戰同程獲亞，證明路合、班利、狀態大勇，今仗補中在望。

第八場第三班一二〇〇米泥地：「齊心同行」準備充足試四課閘，不負所託一擊即中，輕取接戰彈甩補中的「叻叻精彩」。上仗升班票勁一樣充滿信心，可是有前無後，順利放出入直路卻迅即腳軟，騎落毫無反應，原本以為健康有問題，但賽後騎練馬上解畫，原來「齊心同行」的舌頭褪了後邊，即未有擔咇。

復課不久見「齊心同行」加脷帶快跳，試來神閒氣定，之後更試埋大閘，該課泥閘從容勝出，確認證明綁脷有用，亦顯示泥地性能極佳，再睇上仗賽前試四課閘，唯一的一課泥閘跑第二，僅負於高班馬「鴻運飛鷹」而拋甩其他對手，肯定泥地必合。