飛馬輝煌一枝獨秀

波健士騎功好唔好就見仁見智，不過勝在夠快閘，也因此跑短途賽特別醒神。要波仔放無問題，要他留則好有問題，繼早前「美活人生」出事，剛戰策「文武先鋒」又中招，由於事態嚴重要另擇日期審訊，相信波仔在香港的策騎生涯將會告終了。

第三場第四班一二○○米：「飛馬輝煌」加盟石廄之後筆者一直有留意，此駒早已展現出好質素，首兩戰獲一冠一亞，之後未能再贏也次次接近，當中包括一仗三班賽。而轉倉後見練者安排準備工夫充足，尤其試閘加罩勝出，早已證明配備啱用，奇怪的是上仗未戴眼罩出戰，主操兼跑開的梁家俊亦未有披甲。

直至三周後「飛馬輝煌」改攻泥地，梁家俊終於跑番更加罩上陣，果然有計展現真身，若非排外檔及負重磅，肯定唔會畀磅輕飄飄的「紅海福星」走甩。今次石哥安排「飛馬輝煌」出戰四班草地千二，馬兒在同程贏過有根有據，尚要今次拆組必遇弱手，形勢一枝獨秀。

第九場第三班一四○○米：「勇闖」上季尾開操，當時只得兩歲，蔡約翰唔心急，安排馬兒做到夠、做到好才出賽，結果無負眾望，備受熱捧一出即勝，姿態輕鬆唔在講，跑出一分八秒六四，是今季四班田草千二第二快時間。

上仗練者安排「勇闖」改攻千四，皆因馬兒首戰已好慢腳，起步唔快早段要畀，去到中段再要騎，雖然最後無功而返，不過考慮到第一次跑三班、第一次出戰千四，尚要沿途走三疊蝕位，跑到第四其實並非太差。「勇闖」已有班次及路程經驗，今戰一定勁揪得多，肉身馬多跑下亦狀態愈見銳利，分頭比上次好，追得過！