「電訊巴打」唞夠再贏

今季華將相當爭氣，佼佼者當數何澤堯，憑「金鎗六十」四度攻下一級賽，又憑日本馬「唯獨愛你」贏女皇盃。另外，梁家俊、潘明輝及蔡明紹亦頻頻交出頭馬，前者並兩度勝出三級賽，再次證明目前華將大騎功高超，而且擁有非凡的抗壓力。

第一場第四班一二〇〇米：「魅力星光」乃一匹飄口馬，以往唔識轉彎，要用好多配備幫助，韋達針對弊端，安排此駒一連四仗出戰直路賽，雖然未能交出頭馬，但連續三仗拼入三甲，演出變得穩定可靠。準繩中進步中的「魅力星光」，大前仗偶一失準不用介懷，前仗復出再次入Q，該戰無再跑直路賽，改攻同程一樣有好表現，尚要應付到谷草急彎，確認踏上了最佳時候。一場未睇真，睇埋上仗劣勢再跑近，遇上慢步速不利追，更走三疊蝕位，這一席殿軍貨真價實。今戰吼準同程再跑過，戰意實力兼備，尚要對手極參差，開齋在望。

第二場第三班一六五〇米：「電訊巴打」之前毫無好感，除了毛色淡馬身唔夠壯，仲要好重口，一直要用雙杆型口銜鐵。然而，此駒一樣三番四次接近，足見能力甚強。前仗「電訊巴打」配黃皓楠起步放得超快，頭三段締速一分十四秒九九，最後居然無腳軟頂到一席第三，而上仗補中則是意料之內，放得唔快也締一分三十九秒四三，難怪亞殿軍「喜蓮慧星」、「友港友笑」上周再出串Q。現時加至六十九分的「電訊巴打」，肯定仍有優勢，練者未有安排牠跑上周三賽事，唞多一個禮拜體力更加充沛，晨課所見愈見斂口，唔放亦無問題，就算今場有馬搶放搞搞震，「電訊巴打」只要變陣留守好位，一樣可以照贏。