醒旺財戰意夠好

史卓豐今季成績唔太好，傷瘉後甚少贏馬，剛戰策「天衣無縫」留放一絕，可是最後觸線時手軟，最終在影相後飲恨而回。筆者在晨課常常見到史卓豐，他在未有操馬時總在玩手機，甚至在行路時亦一直玩，如此玩物喪志，何來會有好成績。

第四場第四班一二○○米：「醒旺財」過往急口唔放鬆，為此不斷改動配備，今季初同樣有上述舉動，變得多終變好，試出只用頭罩最合適，近五仗就全部躋身前列。大前仗「醒旺財」在檔靚之下發揮好，眼看勝利在望之際，無奈超級馬「佳運財」黃雀在後，之後一戰排檔差，留後跑第五表現絕不差，而且前列馬甚至蹄下敗將「十二馬」、「齊齊友福」、「活力長勝」、「真感」及「功夫茶」之後均有好成績，賽事水準甚高。

上仗「醒旺財」同樣有料到，唔再留跟番前再拼入Q，話唔定係匹高質馬，現時評分有優勢乃肯定之事，最重要韋達手風順番好多，董事馬決心交代戰意又好，乃今仗穩膽之選。

第八場第三班一二○○米：「快快有」初出跑直路賽後上得第二，只是不敵之後再贏「怡心聲」。之後此駒再出轉戰谷草並增程跑千二，場地陌生唔緊要，排九檔亦無有怕，在起步後極速切入二疊，繼而入直路一踩油逢馬過馬，僅打兩吓反手鞭便能輕勝而回。上仗「快快有」變陣跑番田草又得手，誇張到中段受阻無影響，未有卻步入直路更愈衝愈勁，跑出一分九秒一七，更比同日另一組三班頭馬「帝豪寶寶」一分九秒三八快。僅僅三歲已交出非凡成績，「快快有」肯定大把前途，三班留唔住之馬，今次更落在較弱的一組，負磅又唔重，形勢一枝獨秀，篤定三捷。