「都市神話「銳氣正盛

大多參戰馬留待今朝試跑，昨朝場面自然較冷清，幸好接近九時出現高潮，日本代表全部出現，其中四駒更進行快跳。

「野田重擊」莫雷拉草地跳兩段，末段快開勁如炮彈，過終點後慢慢按停聽教聽話，有頂級馬風範，馬身收得壯碩，極速適應水土。 「神業」史卓豐草地跳兩段，年紀雖然唔少，但試來依然係威係勢，既充滿朝氣，神態又夠威武，落腳爽朗有彈力，極具好感。 「唯獨愛你」戴頭罩助手草地跳兩段，很快已適應水土，馬身夠壯夠實淨，情緒比前好，一課比一課省鏡。

「謀勇兼備」戴頭罩由松山弘平跳兩段，輕輕鬆鬆走過，已跳出唔錯時間，展步流暢利落，神態活躍火力充足，且身形夠壯，狀態夠勇。 「符號」戴頭罩由黎海榮拍「電訊超班」跳三段，拍住走好牽強仍未夠放鬆，好急口頭擰擰，另馬身又唔夠壯，尚有好多不足地方。 「都市神話」戴頭罩由副練跳一段，按住順走，昂首闊步勁度充沛，銳氣正盛，愈贏愈有氣勢。

「佳運來」戴頭罩由黃皓楠跳兩段，捉到實以慢速完成，比較多汗濕，慣性如此不用介意，力度唔錯走勢硬朗，神態亦對辦，早前試閘表現不錯，老當益壯之馬保養甚好。 「三劍俠」戴頭罩由助手拍「好攻勢」跳兩段，一如大多石廄自購馬，馬身比較奀瘦，上力亦好一般，進度平凡。

「美麗掌聲」助手拍「飛凡」跳兩段，一直以個多身位領先，慣性有少少懶，末段要畀兩步，狀態大致保身，馬身壯健，毛色金光閃閃，狀態長期對辦。 「無限驚喜」副練跳兩段，末段曾伸頸，力唔夠表現，色水仍淡多少，睇頭欠奉，唯一見好轉倉後操得，起碼健康轉好。

「觀世界」戴頭罩由助手跳兩段，比前更乖巧，表現放鬆韁口穩定，展步流暢勁力充裕，神態暢旺，弗到漏油。 「美麗日子」戴頭罩由助手跳一段，按住大步完成，姿態尚算輕鬆，但力度可更好，火氣亦唔夠，未復最佳時候。 「逆市奇爸」助手跳兩段，出腳拖下拖下力度唔夠，初起階段，仍待磨練。