紅旺添食在望

雖然仍遙遙領先，但宿敵潘頓氣勢如虹，莫雷拉難免感到壓力。老實說，兩人騎功同樣達到登峰造極境界，潘頓的走位出色、掌握步速爐火純青，雷神強在夠快閘且判斷準繩。不過若要再作比較，始終是雷神較可靠，因為他的演出穩定得多，絕少有質議性演出，也因為這份穩定性，因而長期得到最頂尖的練馬師支持。

第六場第四班一四〇〇米：「紅旺」今季首兩戰並無威脅，到第三戰落五班強配除罩，並跑番最有把握千四米，在萬事俱備下大勝而回。勝後練馬師安排此駒長唞未有上陣，並非健康出現問題，純粹馬主賣盤等新買家，在被逼要休息下反而仲好，因為「紅旺」昔日又急又重口，長唞可慢慢調教。相隔數月「紅旺」的缺點盡改，戒急戒重口。前仗看其復出路短弱配入Q，上仗勝途強配當然更好，誇張到拋甩大勝，跑出分一分廿一秒三四，比當日三班頭馬「心中有馬」一分廿一秒八九更快。勝後加十分看似重手，幸好毋須升班，「紅旺」今日繼續出戰四班依然有利，今戰快馬唔多形勢大好，添食在望。

第八場第三班一二〇〇米：「青心星」第一次跑谷草即勝，姿態輕鬆之餘，並締出一分九秒五三佳速，之後備受追捧未能再贏，幕後將此駒轉到方廄。方嘉柏接手「青心星」後按部就班，起初安排牠在沙田訓練，見其太急唔夠定，於是安排上從化洗滌心靈，當地環境寧靜，「青心星」變得淡定，試閘一課未有扭計，起步順滑流暢，最後追上愈衝愈勁表現出色。上仗「青心星」初出未能一戰功成，但一千路短並勉強搶放，拼入三甲已有交代，今戰改攻千二啱跑得多，且最強對手「快快有」升班增程有顧忌，相對「青心星」已三度在三班上名當然可靠得多。