「雙節棍」勝望彌高

第一場第五班一六五〇米：「醉開心」前仗排七檔起步，之後極速攝入內欄，入直路偷內檔衝，而潘頓知道「醉開心」唔受得鞭，所以只齋推，可惜「精彩飛動」先走先發力，加上「醉開心」再要轉彎出番中疊衝，最後來遲半步僅負唔抵。

上仗前「醉開心」唞夠唞足，更排埋黃金一檔，然而表現卻不似預期，歸根究柢是唞耐了適得其反，體重增至一一四二磅，比前仗重廿一磅，亦是有史以來最重一次。雖然今次同樣唞夠，不過一睇再睇都唔覺「醉開心」有肥態，上周四落草地拍跳更充滿活力，狀態弗得很，退熱值得追多次。

第二場第四班一六五〇米：「雙節棍」首季受傷無跑過，上季傷瘉卻次次是冷門，寓賽於操多於一切，累積減分已多，加上今季踏上正軌，終於來個大翻身。「雙節棍」首次贏馬只在五班，但本身細細隻身型輸蝕，有本事彎尾頂開對手，繼而望空後上輕勝非比等閒，難怪接戰升班轉場排外檔也拚入Q，跟手扳上千八再贏。

之後「雙節棍」兩仗拼敗，表現看似失望，實則次次留前鬥後表現好，大前仗卻改去放頭用錯跑法，前仗則因拼搏太多體力不繼。上仗此駒唞夠升磅，又一次有神勇演出，若非落後太多應入Q甚至贏馬。今次「雙節棍」改攻谷戰對手弱得多，再次唞夠馬身收得壯，真係想輸都難。