「發財好市」佳態洋溢

昨朝出跳的參戰馬不多，主要來自姚、文、石及容廄，但當中不乏勇馬，而且不少由騎師出試。

「豹子頭」助手拍「盈嘉輝」跳兩段，剪了毛兩截色，高班泥地專家唔會跳得太勁，不過火氣可再好，比起弗時差得遠。 「閃耀榮光」戴頭罩由助手跳一段，出腳輕巧有彈力，神態暢旺朝氣勃勃，馬身脹卜卜，力度亦夠充沛，晨課之星長期省鏡。

「發財好市」潘頓拍伴跳馬跳兩段，直路加速追上反應極佳，步活如輪充滿勁度，馬身收靚展現線條美，傷瘉馬佳態洋溢。 「夢幻人生」郭能跳兩段，聚精會神極具朝氣，出腳利落勁度充裕，外觀對辦身好靚，確認全面回勇。

「總理」梁家俊跳三段，逐步加速氣宇軒昂，愈見淡定快慢由人，步爽身靚實淨，火力不斷增強，踏上最佳時候。 「醒臣」助手跳兩段，戴面箍，一貫急口頭岳岳，緊扣下捉得住，馬身依舊好壯，毛色亮到發光，威風凜凜，長期勇銳。

「閃耀中華」戴頭罩由史卓豐跳三段，中檔順住走，仲係急少少，馬頭兩頭擺，馬身唔算靚，馬有款頭，但狀態仍有不足。 「非凡才子」戴頭罩拍助手跳兩段，向來有點急口，沿途暗力拉實，毛色悅目身又夠壯，火氣未減半分，狀態一直在上佳水準。

「中華威威」戴頭罩由莫雷拉拍「椰子糖」跳兩段，腳法一貫唔靚，但試來頗神氣，走勢硬淨火力俱備，末段追上過馬動作極之流暢。 「尖子」巫顯東拍「電訊巴打」助手跳兩段，前駒戴鼻箍，頭岳得高改不了，力度亦說不上足夠，依然故我徘徊不前，後駒戴頭罩，仍有點步緊緊，口勁亦甚重，不過外觀愈做愈靚，而且確認係質素不差之馬。

「東方繁華」助手拍「符號」巫顯東跳三段，前駒開步一向有點緊促，看來仍改不了，論態已在水準，馬身收得好毛色靚，後駒戴頭罩，大半程郁身郁勢，力度只屬普通，自購馬仍未適應水土。 「富高八斗」助手跳兩段，大步走過姿態輕鬆，雙目有神，馬身實淨毛色潤澤，打仔馬持續態勇，刻意唞夠現時多添一份新鮮感。