達心星手執盃耳

蘇銘倫再次來港客串，受影響最大當然是田泰安，踏入一月份頭馬量大跌。同時因為蘇銘倫來勢洶洶，兩大巨人莫雷拉和潘頓變得特別起勁，其中莫雷拉更受惠於蔡廄近期強勁攻勢，預期未來兩個月將會取得更多頭馬，可望進一步拋離潘頓。

第四場第三班一四○○米：「北極光」台型靚到不得了，試閘走勢爽夾勁，初出即捧到廿六蚊，跑第二無有怕，再出繼續被熱捧，最終順利補中。之後「北極光」因傷休息了半年，復出一樣表現醒神，首戰排檔差劣仍能拼入三甲，跟手變陣改攻同程又贏。奇怪的是千四米好開，大前仗練者卻安排縮程，亦因部署失當，未能保持次次上名佳績。近兩仗「北極光」跑番千四表現回復神勇，誇張到次次用唔同跑法，前仗快放上名後追，若非上仗衝刺閃完再閃更應贏馬。

「北極光」目前的評分極具優勢，練者唔再變陣繼續安排牠繼續攻千四，大家可以放心，加上今次用番潘頓人馬又夾，有利條件盡集一身，今次又可贏番一場。

第八場四歲馬一六○○米：「達心星」上季已充滿星味，五戰取得兩冠兩亞。而今季此駒表現就仲犀利，首戰排大外檔輕勝而回，接戰在孭頂磅兼一度受阻下，贏來兵不血刃。前仗就最誇張，跳升兩個班次跑一班賽，同時大幅跳程由千二跳上千六，居然照贏可也。到上仗「達心星」甚至出戰三級賽，對住班頂級馬毫無懼色，受阻下也能拼入Q。

「達心星」是今場唯一評分過百的馬，亦是唯一贏過一班賽的馬，現時看其狀態弗得交關，今仗捧盃呼聲高唱入雲。