「股票傳奇」超級再贏

第六場第四班一二〇〇米：「股票傳奇」上仗只贏四班谷草賽事，但足以成為矚目新星，直頭似足「巴基之星」，上次點勁法？「股票傳奇」一起步大漏閘，繼而又頭側側不受操控，當時起碼落後尾二馬七、八個馬位。之後騎足大半程才勉強跟番馬群，但入到直路仍在尾二位置，之後準備望空又被「桃花旺」帶向外跑，點知遇到連番意外，最後一樣逢馬過馬，衝刺如箭。

之後「股票傳奇」休息了三個月有多，並非健康有事，只是要試閘一再及格才可出戰，亦因為經過多課測試，其缺點已大有改善，由慢閘變到唔慢閘，加上莫雷拉搶閘工夫一流，估計今仗出閘應會順順利利，超級馬篤定再贏。

第七場第三班一六五〇米：「肥仔威威」雖然個名叫肥仔，實則卻瘦瘦削削，也因此不太襟搏，正如今季首戰因唞夠贏馬得手，之後兩戰就不斷跌磅，以至表現失準。針對以上不足，上仗練馬師安排肥仔威威唞了七個禮拜，儲足體力捲土重來，亦因為唞到夠體重激增，比起前仗升三十磅。勇況已備之馬用到蘇銘倫，可以話萬事俱備，但卻遇上超慢步速，對要追、要快步速幫助的「肥仔威威」當然不利，何況入到直路塞塞碰碰，未有直正望空，敗績可以抹去。

看上仗「肥仔威威」用力不多，今次尚要唞一個月，不用膽心體力不足，睇埋近期操得跳得，大家可放心追捧。