「幸運精選」蓄勢待發

昨朝出跳參戰馬並不多，主要來自容、偉、蔡及文廄，當中不乏勇馬，現將所見報道如下。

「協進神駒」戴頭罩由周俊樂跳三段，外觀做得好，但頭側側唔太規矩，力度普通，初起未足。 「美麗掌聲」助手跳兩段，步爽雄渾有力，粟色毛色亮到發光，馬身脹卜卜，打仔馬長處勇境，且體力極之充沛。 「紅運大師」戴頭罩拍助手跳兩段，一貫戴上雙杆型口銜鐵試，暗力拉實火氣不弱，神采奕奕上佳水準，最近試閘表現又好。

「幸運精選」戴頭罩由田泰安跳兩段，輕描淡寫完成，走勢硬朗勁度不俗，神態活躍充滿朝氣，唞夠操足之馬，蓄勢待發。 「遨遊之星」戴頭罩由副練跳一段，慣性豎尾，平穩走過而已，外觀可以，但說不上吸引。 「經典之星」助手跳兩段，大大步輕鬆走過，展步順滑有彈力，目光銳利，狀態一直吸引未見低落。 「雄龍」戴頭罩由彭國年拍「醒目再臨」跳三段，躍躍欲試好火好力，沿途要緊韁抽實，極之生猛，灰馬身壯飽滿，勇況保持。

「澳華威威」戴眼罩及頭罩助手跳兩段，並且有埋鼻箍，成抽配備已唔鍾意，而且好急口唔放鬆，亂咁走左片右片，生得好緊要。 「觀世界」戴頭罩由薛恩跳兩段，刻意快開反應唔錯，轉腳流暢，力度增強，馬身愈收愈靚，開氣後進步不少。

「無敵勇士」郭能跳兩段，外觀一向睇頭，大大隻身好壯，然而氣勢唔夠火氣亦弱，比弗時差得遠。 「天衣無縫」戴頭罩由黃俊跳兩段，馬身靚過之前，有肌肉粗壯結實，出腳漸見熟練，唔再拖泥帶水，狀態大有進展。 「夢幻人生」助手跳兩段，高班馬唔會跳得太差，不過勁度平平，唔夠氣勢唔夠火，狀態未復最佳時。

「元朗之星」史卓豐跳兩段，愈來愈收斂，昔日搶走鏡頭不復見，論態對辦，走勢硬朗力度充足，回程時頭岳岳更好神氣。 「火箭砲」助手拍「榮華煌昌」波健士跳兩段，同樣戴頭罩，前駒腳法唔靚，前腳出得高，但力度明顯增加，狀態說不上弗，但比起之前已好了不少；後駒拍跳唔懶散，神情專注步穩有力，馬身亦實淨，觀感不俗。