超勁勇士志在必得

田泰安近年坐穩三哥席位，他的勤奮努力，騎功不斷進步，全是其成功之因素，亦因為他搏殺夠準，一班頂尖練馬師都對他作鼎力支持，其中告東尼更係最大「票倉」。然而自從十二月十三日後，安仔再無跑東廄馬，猶幸上周二他仍替「日日精彩」試閘，下周日亦有望為此駒繼續效力，若屆時能交出佳績，相信告仔仍會給他一個機會。

第二場第五班一四○○米：「喜多樂」上季下旬傷瘉，加上落五班佔優勢，落班第二仗即在同程勝出，之後重返四班一樣醒神，兩戰都躋身前四。今季「喜多樂」繼續在四班出戰，雖然未曾走入三甲，但當中三戰跑同程，每次都輸得接近，更吸引的是次次際遇欠佳，058場沿路走三疊兼無遮檔；112場排十四檔留到最後，轉彎走出大外檔；206場全條直路受困無望空過。

今仗「喜多樂」決意落班搏殺，上仗此駒爭直路賽全為減分，得償所願後今仗即跑番首本，看賽前跳三課次次吸引，尤其拍「足金好球」一課，不落下風更搶盡風頭，配合埋丁廄攻勢而來，勝望壓一。

第九場第三班一六○○米：「超勁勇士」上季仍有很多不足之處，晨課顯得懶洋洋，每逢過終點前一定要畀兩步，若果唔畀就會收停，難得在陣上依然能交出佳績，足見能力極高。今季「超勁勇士」升上三班，首戰熱捧雖三甲不入，但跑第四只輸四分三身位表現及格。拼罷該戰「超勁勇士」足足唞兩個月，休戰期間從未缺課，單是大閘就試夠兩課，且每課都有轉變，唔再懶並能輕鬆跟前，末段並維持勁勢，結果之後上陣再贏。上仗「超勁勇士」只唞兩周出戰，仲要首度扳上千八落敗情有可原，今次跑番千六且再變招改戴眼罩，擺明志在必得。